Mi ta contento di por a scucha parlamentario Jennifer Arends-Reyes cu porfin den oposicion a corda cu e maestronan tambe ta existi. Mi ta lamenta cu sra. Jennifer Arends-Reyes tabata tin tur elemento pa haci tur cos posibel y cu el a menciona entre otro Veiligheidsschool, Functiehuis por a ser ehecuta pasobra nan gobernacion a conta cu 12 parlamentario y nan mesun ministernan entre nan nan mesun colega di partido sra. Michelle Hooyboer-Winklaar.
Scolnan Saludabel
Sra. Arends-Reyes no sa drechi kico Scolnan Saludabel ta encera. Mi persona tabatin e honor di por a traha cu e proyecto aki y cu Cacique Macuarima School tabata un ehempel cu a ser usa pa su gobierno pa haya sa con nos a pone esaki draai, entre otro enfocando riba deporte y tambe riba conscientisacion unda cu nos a bin cu dia di desayuno, dia di awa y alaves enfoca riba treatnan saludabel. Tambe a bin cu carousel di salud unda cu nos a toca tema di salud y unda a invita entre otro dentista, dietista. Pero tambe a organisa carousel social unda nos tabatin instancianan manera Wit Gele Kruis, FADA etc cu a bin papia riba entre otro uso di droga, alcohol, embaraso hubenil, malesanan contagioso y asina nos a duna contenido na esaki y a bira parti di nos curiculo escolar. Pero di parti gobierno a papia di e scol saludabel pero no tabatin fondo pa esaki y ta scol mester a busca fondo y sponsor pa por haci esaki posibel. Pues si pa esaki Jennifer tabata asina preocupa e por a exigi su minister pa pone fondo disponibel ya cu den mi concepto esaki ta un tremendo idea pa conscientisacion. Alavez e ta percura pa mas y mas hende cuminsa come mas saludabel pero tambe haci mas movecion. Y sigur den esaki mi a core campaña y mi ta spera cu por logra esaki y cu mester bin mas proyecto manera Parke Curason na Jaburibari pa duna contenido na movecion sano den bario.
Veilige School
Mi ta completamente di acuerdo cu mester protega e docentanan. Y mi ta spera cu Minister di Enseñanza pero tambe di Husticia por traha en conhunto pa porfin bin cu un plan concreto pa esaki. Test pa droga y alcohol ta un parti di esaki y no solamente pa e alumnonan pero tambe pa e cuerpo di docentenan pa garantisa un clima escolar sano. Banda di esaki mester crea un structura pa brinda ayudo na hobennan cu problemanan social y di comportacion y esnan cu por faya e test di droga of alcohol, pasobra derecho di mucha ta exigi pa nan por ser yuda y no exclui. Pues bin cu test djis pa saca un mucha di scol no ta e solucion pasobra na final di dia si no yuda e alumno mayan e por toca bo porta di cas pero den otro forma simplemente pa motibo cu nos a cera wowo pa nan.
Codigo di comportacion pa docente
Mi no a scucha Jennifer Arends-Reyes papia riba e codigo aki cu mester ser para di inmediato y revisa esaki, pasobra manera cu e ta actualmente e ta ser malusa. Na e momentonan aki tin un caso di un docente pasobra el a expresa su mes riba Facebook y su expresion a toca un famia cercano di e directora y esaki a haya di bon pa duna e docente un berisping por escrito, unda cu ta muestra di ta malusa esaki y a kibra e libertad di expresion di un ciudadano ya cu na e momento ey e no tabata den su funcion. Riba kico el a reacciona no tabatin nada di haber cu scol y ni cu ningun trahador of alumno. Y e docente corectamente a manda su bezwaar pero te awe e no a haya contestacion riba esaki, unda cu den un fundacion e procedura di LMA no ta aplicabel y mayan si yega na kita e docente aki e lo mester bringa su caso na un Huez Civil y unda ta muestra cu e locual tin riba papel huridicamente no ta cuadra cu realidad. Pues mi ta urgi Minister pa stop y revisa esaki.
Appel di Oro
Tin mas manera y sigur mas husto pa recompensa maestronan. Mi tin mi opinion y sigur den bista con esaki ta bay, ami y hopi maestro no ta acuerdo cu esaki. P’esey mi a manda un mocion unda cu mi tin sigur cu esaki ta un reconocemento pa tur maestro pasobra pami tur ta appelnan di oro cu ta sali di mainta tempran di nan cas pa haci nan trabao den situacion hopi biaha malo pero na bienestar di e mucha. Hopi di nan nunca lo ser reconoci pero si ta haci inversionnan grandi den nan klas pasobra nan ta gusta esaki, pero dia pa dia esaki ta bira mas costoso. P’esey ami a propone pa duna nan anualmente 250 florin como compensacion pa nan por cumpra material y den caso cu no por debi na situacion economico cada dos aña p’asina nos ta duna gratitud pa nan trabao y sigur lo por ser mihor usa cu un pin di appel cu na final hopi no sa ni unda e ta mas. (E ta sigui)
