Riba e fecha di 17 november 2017 mi a huramenta pa sirbi pueblo como parlamentario. Mi deber ta di defende pueblo y percura pa bienestar di pueblo. Y mi tin e deber di sali pa mi barionan di Santa Cruz unda cu mi persona ta representa y cu hopi orguyo. Mi tin di bisa cu tabatin e mal custumber unda cu si bo ta parlamentario cu ta representa e gobierno, bo mester ta un “Cheerleader of un Stempelparlamentario”, pasobra esey sigur nos a wak como ehempel e ultimo 8 añanan di gobernacion di AVP y ta pakico te dia di awe lamentablemente e mesun modus operandi a keda di AVP, esta di keda papia y grita locual nan ta ser instrui y bo por wak esaki atrobe den tur e cosnan sin contenido cu por ehempel parlamentario Michael Lampe ta trece dilanti y caminda su manera di hiba politica ta ser defini door di nan lider Mike Eman.
Voz di Pueblo ta voz di Dios
Y ta netamente e mentalidad aki manera esun di Michael Lampe y su coleganan cu a hiba nos te unda nos ta awendia. Nan ta ser maneha manera Titere, unda nan no por tin nan mesun opinion y unda locual bisa nan pa haci nan tin di haci sino nan carera a caba. Como parlamentario y sigur esnan cu ta representa gobierno di Aruba, ta nos deber di elogia ora ta bon, pero tambe di trece dilanti nos preocupacionnan y critica e gobierno pasobra con cu bay bin den diferente area nos tin conocemento y tambe hopi experencia. Y mi persona como parlamentario ta haci mi trabao, mi ta expresa mi opinion, mi lo ta oposicion tambe pa percura pa cumpli cu locual nan a priminti, y no ta importa si mi manera di hiba politica ta gusta of no, mi ta hacie manera pueblo a pidi mi pa hacie y cu na final di dia ta pueblo ta esun cu lo bolbe bay urna y eligi ken e lo kier pa ta su representante pasobra Voz di Pueblo ta Voz di Dios y cua resultado cu e ta lo mi biba cune .
Mehoracion den Infrastructura
Mi ta hopi contento di por wak movecionnan riba infrastructura y nos por a tuma nota di Minister Dangui Oduber cu a anuncia varios proyecto pa por mehora infrastructura den area hotelero manera ta embeyecimento di Malmok y dilanti Highrise. Y hopi importante tambe e anuncio di mehoracion y embeyecimento di Baby Beach y Rodgers Beach. Proyectonan hopi importante si nos kier atrae inversionistanan den area di San Nicolas y cu Gobierno anterior a neglisha di haci y a hunga cu sentimento di pueblo pero specialmente di esnan di San Nicolas. Ta hopi importante tambe pa despues sigui pa mehora e infrastructura y basa riba un mocion cu mi persona a entrega pa drecha entrada di Colony, e infrastrcutura pa peaton y ciclistanan por haci uso di e zona aki cu na final di dia si bin inversion hotelero e turista por haci uso di esaki como area di entrenamento. Y ami sigur ta un persona realistico cu ta wak cu nos tin di custumbra di biba sin e refineria y cu tin otro opcionnan pa e lugar aki cu nos por diversifica nos economia. Banda di esaki tambe nos por a wak nos Minister di infrastructura Otmar Oduber basta activo pa locual ta bashamento di asfalt den diferente zona residencial, cu ta bon señal cu pueblo por spera mehoracion den nan barionan.
Santa Cruz, e distrito lubida
Den periodo di campaña tur partido politico y politiconan conoce Santa Cruz pero na final di dia ora drenta gobernacion barionan di Santa Cruz a bay pa olvido. Durante gobernacion di AVP nos a wak hopi inversion den infrastructura basa riba e ideologia di fia y pa despues pueblo paga y unda cu nos tambe tin cu paga pa esakinan. Nos a wak esaki den embeyecimento di Playa unda cu diferente bario a ser rondona cu klinkers, San Nicolas y tambe barionan rond di e Proyecto di Green Corridor y Watty Boulevard a conoce mehoracion di careteranan, Paradera Corridor, Piedra Plat Corridor y por sigui menciona. Pero sigur pa locual ta Santa Cruz ta parce cu ora yega rotonde na ex Drive Inn ta bula pueblo di Santa Cruz over. Y e sentimento aki ta biba atrobe ora wak cuanto infrastructura ta ser mehora rond di Aruba actualmente y despues ta bin benta un tiki stof den wowo di pueblo di Santa Cruz. Pa Santa Cruz actualmente ta aplica e mehoracion di infrastructura yama “LAPI LAPI”.
Camindanan den hopi mal estado
Nos caminda principal ta un desaster completo, barionan manera Warawara, Picaron, San Fuego, Macuarima, Coba Lodo, Shete, Angochi entre otronan ta parce cu ta riba luna bo ta core di con malo e camindanan ta. Na Sabanilla Abou, Macuarima y Jan Flemming ciudanonan no por ni habri nan bentana di tanto stof y sigur Jan Flemming cu den plan Bo Bario a ser poni pero hamas como prioridad cu solamente malusa e ciudadanonan door di AVP. Otro ehempel ta cu ta boga pa poco verkeersplateau entre otro na Shete, Coba Lodo, Angochi y Hooiberg (entrada banda di Well Well) debi cu entre otro operadornan di tours ta core den forma iresponsabel eybanda y ta causa peliger pa peaton y muchanan, pero recientemente por a nota den un bario cu a pone como 10 verkeersplateau den menos cu 200 meter di caretera incluyendo 4 plateau na un cruzada y unda cu por a usa sikiera 3 di esakinan den e barionan aki. Pasobra si ta bisa cu esakinan ta costa hopi placa anto no por ta sinta dispidi placa asina y por haci mihor uso di parti esakinan rond Aruba.
A yega momento tambe pa e barionan di Santa Cruz conoce mehoracion pasobra nan tambe ta pertenece na pueblo di Aruba y nan tambe ta contribui pa paga tur proyecto rond Aruba y nan tambe ta contribui cu un crisisheffing pa motibo di mal gobernacion di gobierno anterior. Mi ta spera cu Gobierno por pone tambe Santa Cruz como prioridad pa mehora nan infrastructura y no lague pa promesanan bashi di campaña manera tabata den pasado.
