Papiando riba e fenomeno di atraconan cu ta mirando un biaha mas, Parlamentario Alan Howell a indica cu esaki ta un tema alarmante y fastioso.
Loke ta mas fastioso di esaki ta cu ora cu tin un atraco politiconan ta bin dilanti haci fanfaria y hunga politica cune como si fuera ta wega e situacion aki ta. “Atraco no ta wega, atraco no ta cos pa haci pret cune. Nos mester wak con nos ta bay yuda Cuerpo Policial bringa contra atraco”.
Howell ta bisa cu atraco ta manera un guera, mester planea con ta bay ataca bek, pasobra ningun hende cu ta bay comete un atraco no ta bay yama bisa minister di Husticia bise cu awe e ta bay comete un atraco y mucho menos Cuerpo Policial. Ta bon mes cu nos ta conta cu un bon inteligencia den Cuerpo Policial cu hopi biaha tin tip of atraves di investigacion tin un idea di kende ta e persona(nan) cu sa tira atraco y hopi biaha prome cu nan hacie mes ta paranan.
Alan Howell a traha den Atraco Team pa mas di 10 aña y e tin e experiencia den esaki. E ta indica cu combati atraco no ta e cos di mas facil. Y den e cuadro aki a reuni cu minister di Husticia pa wak con Parlamento por yude of asistie pa bringa e tipo di criminalidad aki y si tin mester pa aproba pa mas fondonan bay pa combati esaki, Parlamento lo ta dispuesto pa haci esaki. Dunando un poco mas di splicacion pa loke ta e fondonan aki, Alan Howell a indica cu esakinan por bay pa por ehempel mas material y mas oranan di polis pa hacie cierto investigacionnan.
Tambe Howell ta considera cu minister di Asuntonan Social mester traha conhuntamente cu minister di Husticia teniendo na cuenta e situacion social na Aruba cu den cierto casonan ta liga na criminalidad y den e caso specifico aki, atraconan. Igualmente e ta wak e importancia di concientisa mayornan pa paga tino riba nan yiunan, pa tene un bista riba e yiunan, wak ora nan yega cas cu cosnan straño, cu placa of articulonan valioso.
Parlamentario di POR a pidi minister di Husticia tambe pa e polisnan di Bario cuminsa traha den un forma uni pasobra e atraco hopi biaha ta sali di bario y tin cierto movecionnan cu ta indica cu tin cosnan robes tumando lugar. Pesey tambe ta importante pa bishiñanan ta alerto y duna tipnan na polis. Otro punto importante pa frena atraconan ta ceramento di nos fronteranan.
“Combati criminalidad ta algo di nos tur”, Alan Howell a finalisa bisando.
