Minister di Desaroyo Teritorial, Infrastructura y Medio Ambiente Otmar Oduber a reuni cu sindicato FTA tocante tarifa pa recoge sushi, den cual e diferente palabracion a wordo haci. E reunion aki a tuma luga 17 den luna di september 2018. Pa cual Minister Oduber a duna di conoce cu ta reconoce e empeño di FTA, U.E.A y ALVAST pa salbaguardia e interes di personanan di menos recurso manera onderstandtrekkers/ bijstandtrekkers y pensionado cu ta cobra unicamente pensioen di AOV.
FTA , U.E.A. y ALVAST ta recononce e necesidad pa un y tur contribui na un maneho di recoge y procesa sushi responsabel teniendo tanto salud di nos comunidad na pecho como tambe nos medio ambiente. Considerando e puntonan di precupacion treci dilanti pa sindicato FTA y conforme locual a palabra den dicho reunion, cual puntonan ta:
– persona cu tin como unico entrada onderstand/ bijstand ta bin na remarca pa un ‘nultarief’;
– persona cu tin como unico entrada AOV (pension di behes) ta bin na remarca pa un tarifa di 10 florin pa luna;
– personanan den situacion peculair por bin na remarca pa un ‘bijzonder tarief’ di 10 florin pa luna despues di evaluacion y conforme criteria di Departamento di Asunto Social.
Importante ta pa menciona cu cada persona tin e deber di comproba cu nan situacion ta di tal forma cu nan por bin na remarca pa e diferente tarifanan manera indica ariba. Asina gobierno di Aruba ta tene cuenta cu e situacion di esnan cu menos recurso y na mes momento percura pa un y tur contribui na e solucion y bienestar di nos pais.
