Parlamentario Endy Croes ta reacciona riba algun articulo di Mike Eman. Recientemente por a tuma nota cu Mike Eman kier reactiva y a cuminsa bishita tur entiero y ta cana den algun bario. Mike Eman despues di eleccion a anuncia den un tono hopi emocionante cu e lo retira di politica y alaves como lider di AVP. Mike Eman enbes di asumi su responsabilidad den Parlamento a laga su 7000 votadornan na caya y a tuma vakantie casi un aña largo den su penthouse. Mike Eman a laga algun mucha astuto cu no ta compronde politica drenta Parlamento y bay carga tur e golpi cual ta consecuencia di su maneho fracasa.
Placa ta cabando cu AVP-istanan
Mike Eman despues di a laga Aruba pio cu tempo di holocausto atras awor ta busca bek un entrada. Placa ta cabando cu diferente miembro di AVP. E bida dushi di malgasta placa di pueblo ta pa pasado. Otro ex-parlamentario di AVP a bay traha den refineria na Surinam. Asina por nota e ansha pa poder y e dolor cu placa no ta core mas manera antes. Esaki ta e motibo primordial cu ex-coordinadornan kendenan tambe ta bashi actualmente a cuminsa cuestiona Mike Eman poniendo un presion enorme pa e por reactiva y trata na salba partido AVP, alabes haci cuesta loke cuesta pa purba drenta gobierno bek pa nan por tin bida financiero sin importa cu e Pais.
Logronan devastador di Mike Eman
Por tuma nota di un articulo den prensa di Mike Eman unda textualmente Mike a skirbi “Loke AVP a drecha den 8 aña Gobierno a kibra den 1 aña”. Kisas mi lo laga esaki pa pueblo mes contesta Mike. Den 8 aña Mike a redobla e debe nacional di 41.7% pa 90%, esta 90 cen di cada florin cu bay na belasting awe ta comprometi na debe cu Mike a ocasiona. Un logro di Mike den 8 aña. Awe nos mester paga 219 MIYON florin solamente na interes esta mas cu 600 mil florin pa dia riba placa cu Mike y AVP a presta. Esaki ta otro logro di Mike Eman. Un debe total di 2.2 BIYON (den 23 aña di Status Aparte) awe ta 4.4 BIYON florin. Esaki tambe ta logro den 8 aña di Mike Eman. Desde e aña aki pueblo lo bay paga 80.7 MIYON pa 20 aña largo na proyectonan PPP (Pa Pueblo Paga). Un otro logro den 8 aña di Mike Eman. Mike Eman a regala na companianan di mercadeo 89 MIYON florin, entre otro Thera Group y Paxi di su amigo Patrick Paskel y Speed, Leoncita Canal 90, Oscar Fernandez pa nombra algun cu a goza di placa di Pueblo. Esaki ta otro logro den 8 aña di Mike Eman.
Grupo piratanan di AVP
Un otro suma di 120 MIYON florin a wordo destina na abogadonan amigo di partido AVP bou di e nomber “deskundig advies”. Danki Mike Eman, esaki ta un otro logro den 8 aña di Mike Eman. Si suma 89 MIYON y e 120 MIYON cual ta surpasa 200 MIYON florin nunca mester a bin cu un crisis heffing si Mike a goberna drechi y no complace su amigonan na un manera sin gevoel. Dia Mike Eman a tuma gobierno over na October 2009 el a haya den caha di pais Aruba 720 MIYON florin di placa di Plant NV, FDA y despues BBO di Valero pues hunto 720 MIYON, sin conta e 200 miyon extra na BBO local. Actualmente Gobierno aki a hereda debe sin misericordia y lastro di huña den caha, un Cocolishi sin informacion, sin computers, file, harddisk. Ta manera un grupo di Pirata a goberna e pais aki ultimo 8 añanan. Pues na Mike Eman y AVP: een toontje lager y duna e Coalicion aki e espacio necesario pa drecha boso desaster. Esaki ta sin cu nos a papia awe riba e robo y fraudenan di tereno di Benny y Mike. Benny, con yama bo primo king of lands?, Parlamentario Croes a termina puntrando.
