Awo lo vigila e siguiente desaroyo pa pueblo di San Nicolas por tin su biblioteca bek
Parlamentario Alan Howell for di inicio a mustra su preocupacion y interes pa loke ta renovacion y apertura di Biblioteca San Nicolas, cual a sufri un retraso basta largo, pero finalmente e por bias cu a logra y siman pasa a entrega oficialmente e edificio bek na e directora.
Siman pasa mes, pa ser exacto diamars, parlamentario Howell a haci uzo di su derecho como representante di pueblo pa yama minister Lampe pa acudi na Parlamento pa contesta 3 pregunta durante un vragenuur.
Segun minister Lampe 2 di su preguntanan mester a wordo dirigi na minister di Infrastructura Oduber. Minister Lampe a splica den detaye cu e trabounan haci door di e contratista no ta cumpli cu e acuerdonan haci y pa tal motibo ta imposibel pa acepta esaki.
Teniendo na cuenta e declaracionnan aki y cu tin di haber cu DOW, Alan Howell a manda yama minister Oduber pa bin Parlamento y duna cuenta durante un vragenuur tambe. Esaki lo tuma lugar e siman aki y Howell lo informa comunidad riba e desaroyo di dicho reunion. El a bisa bon cla “Ami a manda un mensahe cla y raspa, no ta interesami kico ta e problema, pero nos hendenan di San Nicolas y ami kier wak e Biblioteca habri lihe y den gran forma”.
Remarcabel durante e vragenuur cu minister Lampe tabata e ausencia total di parlamentarionan di AVP. No tabatin ni un di nan presente pa bringa pa e causa di algo positivo pa San Nicolas y su hendenan.
Despues di a pone hopi presion den Parlamento diamars pasa, Howell a tuma nota cu finalmente na inicio di fin di siman DOW a entrega oficialmente e edificio di Biblioteca na e directora. Awo e siman aki el lo bay scucha di minister Oduber riba e trabounan realisa door di e contratista cu segun minister Lampe no ta cumpli cu e acuerdonan haci. Tambe lo bay vigila con lihe e proceso di mudamento ta bay pa asina pueblo di San Nicolas por tin su Biblioteca bek.”Working hard on making San Nicolas great again”.
