Mike Eman recientemente a declara su mes como e lider nobo di su partido despues di un aña cu el a keda cu rabia cu pueblo di Aruba cu no a vota p’e keda goberna. Awo direpente Mike Eman a wordo saca for di su cueba y a proclama su mes como un lider nobo.
Pero nos a tuma nota cu di nobo Mike Eman no tin nada. Den su prome salidanan el a sali cu un set di mentira y manipulacionnan. Den su presentacion di e rapport di Banco Central, Mike Eman mes a admiti di a uza grafieknan cu informacionnan cu no ta di Banco Central. Pero Mike Eman a pone e logo di Banco Central riba nan. Esakinan ta graficanan cu Mike Eman y Partido AVP a traha pa asina manipula un biaha mas cu cifra.
Manipulacion di cifra ta precisamente e manera cu Gabineta Eman 1 y 2 a goberna pa e ultimo añanan durante nan gobernacion mustrando constantemente cifranan irealistico y fictisio. Esaki a wordo comproba den diferente rapportnan di CAFT tempo cu Mike Eman mes tawata na mando di e pais aki. CAFT ta indica cu e maneho cu Mike a hiba na 2015 y 2016 a perhudica Aruba grandemente pa motibo cu Mike Eman a uza cifranan ficticio. Esaki por lesa den e rapportnan di CAFT.
Mike Eman a manipula cu e cifra corecto di e deficit cu el a laga pa e pais aki. Mike y AVP ta bisa cu nan a laga atras un deficit di 0.5 prociento. Den e relato anual di CAFT, ta indica claramente cu e deficit cu Mike Eman a laga atras pa e gobierno actual ta di 3.1 prociento.
Tur institutonan financiero a indica cu ta Mike Eman a endeuda e pais aki. Pero Mike Eman ainda ta sigui manipula cu cifranan real pa tira culpa riba e gobierno actual. Tur caminda tin relatonan skirbi di CAFT, Banco Central, Bo Aruba di ARA entre otronan unda tur ta indica cifranan como tambe e mal maneho di Mike Eman.
Y awo e lider nobo di AVP, señor Mike Eman ta sigui cu su mala maña di manipula cu cifranan y informacionnan. Mike Eman no ta comprende cu pueblo por lesa y saca nan mes un conclusion pero ta sigui ofende e inteligencia di nos Arubianonan. Mike Eman ta keda un manipulado y gañado cu direpente awo kier lanta for di soño pa purba stop e gobierno actual di investiga e y su gobierno pa e maneho desastroso cu a conduci cu awe nos ta bibando e resultado tristo di esaki den nos pais.
Mike Eman mes ta admiti cu tin un crisis y tin problema serio den finansa y economia di nos pais. Pero e no kier admiti cu ta e mes ta e causante di esakinan. Pa Eman ta mas facil e sinta manipula pueblo cu cifranan y informacion ficticio cu para den su sapato y admiti cu e ta esun cu a comete un crimen cu e pais aki. Mike Eman mester hal’un banda, drenta den su penthouse y keda keto pa otronan cu si por maneha e pais aki drechi, haci nan trabou pa hiba e pais aki den progreso y prosperidad.
