Na September 2015, 193 pais miembro di Nacionnan Uni unanimamente a adopta e Agenda di desaroyo sostenibel 2030 cu ta e SDGs (Sustainable Development Goals). E curason di e Agenda 2030 aki ta consisti di 17 meta interconecta y inseparabel for di otro pero tambe ta inclui 192 target specifico y predefini pa Nacionnan Uni cu ta acapara un ambito amplio y di aplicacion universal, pues cu ta aplicabel pa tur pais na mundo. SDGs, tambe yama Global Goals, ta un yamada universal pa tuma accion pa caba cu pobresa, protege e planeta y sigura cu tur hende por gosa di paz y prosperidad. Desaroyo ta inevitabel y cada pais tin e oportunidad pa desaroya pero e responsabildad cu niun hende mag di wordo laga atras, specialmente esnan mas vulnerabel.
Metanan di desaroyo sostenibel
SDGs a wordo deriva alabes di MDGs cu ta e Millennium Development Goals cu den e temponan ey a focus primordialmente riba salud y asuntonan di pobresa den paisnan desaroya. E proposito di e agenda aki ta pa yuda humanidad somete su mes na un transformacion of cambio, reconociendo cu sostenibildad di nos medio ambiente ta concerni un dimension esencial y necesario pa desaroyo humano, hunto cu e dimension social, economico y politico. Metanan di desaroyo sostenibel ta brinda tur pais un incentivo pa un curso (direccion) ambicioso pa desaroyo di humanidad door di reforma of recalibra e desaroyo desea y e forma di progreso cu ta deseabel.
Envolvimento y consulta
E agenda aki ta formula di un manera institucional cu ta sumamente participativo di naturalesa. Pa realisa e agenda 2030 di 17 meta y 192 targetnan aki ta necesario envolvimento y consulta di diferente stakeholders manera NGOs, sector priva, sociedad en general y sector publico cual riba su mes ta wordo regarda como innovacion, e asina yama “Conversation Global”. Realisa e agenda 2030 tambe ta pa sigura cu nos por laga un miho planeta atras pa e futuro generacionnan!
Integracion SDGs den plannan nacional
SDGs ta yuda pa caba cu pobresa extremo, bringa desigualdad y inhusticia na mes momento drecha condicionnan of prepara pa cambio climatologico. NOS TUR tin un rol den SDG, pa logra un mundo prospero, husto, sostenibel y duradero. UNDP ta brinda asistencia na gobiernonan y institutonan di mundo pa integra metanan di SDGs den nan plannan nacional y maneho. No solamente ta necesario e integracion di e metanan di desaroyo sostenibel den plannan nacional si no tambe ta urgi tur pais pa stipula maneho basa riba data (evidence based policy making). Pa cada pais cumpli cu e targetnan stipula, paisnan mester tin informacion y indicadornan riba tereno amplio, confiabel y cu bon base pa por dirigi y tuma bon decision. Pero tambe pa tur hende y tur pais ta midi si ta logrando e metanan na un forma uniforme y standarisa. Esaki ta importante pa tin tur pais ta alinea (aligned) y bayendo den mesun direccion pa 2030. Hunto por logra mirando cu un pais no por haci esaki su so!