Muchanan cu ta haci aña prome cu 31 di december awo por inscribi tambe pa aña escolar 2019/2020
Despues di a ricibi conseho di departamentonan di educacion, e titular di Enseñansa Minister Armando Lampe, a anuncia cambionan cu lo bini den nos sistema di educacion cuminsado cu cambionan favorable pa e kleuterschoolnan. Pronto lo cuminsa cu inscripcion pa kleuterschool pa aña escolar 2019/2020.
E decision cu e Minister di Enseñansa a tuma siguiente conseho di e departamentonan concerni ta cu tur mucha cu ta haci 4 aña durante aña escolar te cu dia 31 di december, tin derecho di wordo admiti pa drenta e prome aña di kleuter.
Esaki tawata asina te cu e fecha di 1 di october pero cu e cambio aki nos muchanan ta haya e derecho pa drenta kleuter mas tempran cu e consecuencia cu despues di e dos añanan di kleuter, e muchanan ta haya e derecho tambe pa drenta scol primario mas tempran y nan no ta perde aña escolar y alabes ta elimina e lista di espera di peticionnan di mayornan cu ta desea nan yiunnan drenta kleuterschool prome cu e fecha cu tawata regla den ley.
“E cambio aki lo stimula e desaroyo di educacion di nos muchanan cu awo tin e derecho pa drenta kleuter como tambe scol primario na un edad mas tempran sperando cu nan por ta tambe mas exitoso den scol basico”, Minister Armando Lampe a duna di conoce.