“Futbol Aruba Ballon D’Or 2018” lo tuma lugar Diabierna 5 di October, un evento dedica na e futbolistanan di Aruba

E di dos edicion di e premiacion nan pa e mihor futbolistanan di Aruba lo bira un realidad Diabierna 5 di October na The New China Club.

Despues di un exitoso evenemento inaugural anja pasa, Futbol Aruba, un stichting dedica na promove Futbol y Futbolistanan na Aruba, for di e categorianan infantil te cu Division Honor, no por a keda sin ripiti e bunita dedicacion e anja aki atrobe, mas ainda despues di un campeonato 2017-2018 cu a ofrece asina hopi bon competencia, drama, y deportivismo. Ta tempo pa nos sigui duna atencion na nos futbolistanan; chikito y grandi, homber y muher, pa locual nan merece, pa nan talento, disciplina y esfuerso.

E evenemento lo premia y honra e mihor goleadornan cu un Golden Boot (Sapato di Oro) for di Division U-5 bai ariba, Division Damas, Division Uno, y Division Honor. Lo tin tambe premiacion pa e mihor portero di Division Honor; e nominandonan pa e galardon aki ta Jesus Fria Vizcaino di SV Estrella, Rudolf Benita di SC Bubali y Lionel Kaarsbaan di SV Dakota.

Tambe lo anuncia e anochi aki e oncena “Dream Team”, e formacion di e mihor diesun hungadonan di Aruba su Division Honor den cada posicion for di Portero te cu Delantero, ademas tambe e galardon pa e entrenador di anja den e mesun Division aki.

Pa culmina e anochi aki lo anuncia e ganado di “Futbol Aruba Ballon D’Or” 2018; e tres finalistanan e anja aki p’e galardon tan famoso, cu ta representa pa un ‘bala di futbol di oro’, lo ta; Ricky Hodge, delantero di SV Dakota, Kenroy Ranger, delantero di SV Deportivo Nacional, y Paul Nickenson, Defensa Central di SV Dakota. Tur e tres hungadonan aki a sobresali enormemente den e campeonato 2017-2018, den cual SV Deportivo Nacional y SV Dakota a logra bai final unda cu Dakota a titula campeon di Aruba atrobe despues di 23 anja.

Futbol Aruba lo sigui hasi su maximo esfuerso pa sigui promove, yuda y stimula e ‘deporte rey’ p’e keda riba un bon caminda, esey ta primordialmente dunando atencion na nos futbolistanan, cu ta dedica hopi esfuerso pa deleita nos cu nan talentonan, nan merece hopi.