Durante di Conferencia di Prensa di Gobierno di Aruba dialuna mainta, Prome Minister Evelyn Wever-Croes a anuncia cu Gobierno entrante awe ta duna realse na e Camber di Integridad. Señora Amalin Flanegin ta e persona cu Gobierno di Aruba a encarga pa coordina y percura pa e bureau wordo institui cu su personal y proceduranan mas pronto posibel.
Pa yega na e decision pa scoge señora Flanegin, Prome Minister a ricibi conseho di varios persona entre otro Procurador General di Aruba, Director di Recurso Humano di Aruba, Director di Veiligheidsdients di Aruba, y Director di Centrale Accountantdients Aruba.
Señora Amalin Flanegin ta un hurista y a traha na Ministerio Publico pa hopi tempo. Actuamente señora Flanegin ta trahando na Banco Central. Banco Central ta coopera cu Gobierno di Aruba sin gasto adicional p’asina señora Flanegin yuda lanta Camber di Integridad. Unda cu señora Flanegin a traha den e tereno di integridad den pasado y awo, el a laga un bon nomber atras como un persona integro.
Prome Minister a expresa cu pa Gabinete Wever-Croes ta un honor cu señora Flanegin ta e persona cu lo ‘setup’ Camber di Integridad cu pronto lo cuminsa duna e servicio. Den e proximo simannan nos dilanti, Gobierno di Aruba lo duna tur informacion di e localidad, number di telefoon, y planificacion di e trabounan cu e bureau aki ta bay ehecuta.
“Esaki ta e prome paso concreto pa realisa e vision di Gabinete Wever-Croes y pronto Camber di Integridad lo bira un realidad. Transparencia y Integridad ta otro prioridad mas di Gabinete Wever-Croes. Nos ta desea Señora Amalin Flanegin tur clase di exito cu e trabou aki”, Prome Minister Evelyn Wever-Croes a duna di conoce.