Prome Minister Evelyn Wever-Croes ta invita Aruba henter pa e lansamento di Mobile Makerspace na MFA Santa Cruz awe dialuna 1 di october di 6.00-8.00 pm.
Desde cu Gabinete Wever-Croes a asumi e maneho di pais Aruba, a constata un gap grandi den e area di innovacion den gobierno mes y den maneho pa cu esaki. E falta di maneho structural di innovacion ta un di e causanan cu nos economia a keda stagna. Nos mundo ta cambiando hopi lihe. Tecnologia lo hunga un rol primordial den futuro desaroyo di nos pais. Nos muchanan lo traha trabounan cu no ta exisiti ainda y nos sector laboral lo tin mester di habilidanan nobo. Pa e motibo aki Gabinete Wever-Croes ta bin cu proyectonan innovativo.
Un di e proyectonan nobo ta e Mobile Makerspace. Esaki ta un proyecto di Gobierno den colaboracion cu Biblioteca Nacional y Metabolic Foundation (conoci pa Brenchie’s Lab). Mobile Makerspace ta un proyecto innovativo y sostenibel, y ta encera un bus, ekipa cu e ultimo tecnologianan entre otro 3D printers, computers pa coding, Internet-of-Things, y robotics. E intencion ta pa e bus bishita diferente scol y actividad na nos isla cuminsando cu e camp di DEZHI diabierna, e art fair na San Nicolas den fin di siman y entrante otro siman lo bishita scolnan, trai’merdia, Biblioteca, etc. Di e manera aki, nos ta prepara nos hobennan pa trabounan den futuro cu lo ta hopi tecnico.
Danki na cooperacion di Minister di Enseñansa Armando Lampe, e soño aki ta bira un realidad. E proyecto ta wordo financia pa 75% cu fondo di Union Europeo y pa 25% cu fondo di Gobierno di Aruba.
