Diahuebs atardi Gobierno di Aruba a wordo notifica door di autoridadnan di aeropuerto di un problema cu jetfuel cu a wordo constata na aeropuerto Reina Beatrix. Prome Minister Evelyn Wever-Croes a wordo informa mesora kende a pidi tur esnan envolvi pa pone prioridad na e problema serio aki.
Mesora Gobierno, Directie Luchtvaart y AAA a mobilisa pa busca e origen di e problema y tambe busca un solucion pa e avionnan cu mester fuel. Na prome instante a bin cu e solucion temporal pa avionnan bay fuel na Corsou.
Sinembargo, no a dura mucho cu Minister di Transporte y Comunicacion Chris Romero, a informa cu e situacion na aeropuerto a normalisa. E problema ta limita na un tanki y investigacion ta andando kico a causa e problema.
Gobierno ta den espera di e resultado di e investigacionnan oficial y lo informa e comunidad. Mientras tanto, tur cos a normalisa y avionnan por fuel normalmente na Aruba.