Ta mas importante pa pone e ser humano central cu pa percura cu no tin deficit mas
E siman aki ta tumando luga e Asamblea General di Nacionan Uni (UNGA 73) na New York. Minister President Evelyn-Wever-Croes a ricibi un invitacion pa atende e Assambla General como parti di delegacion di Reino Hulandes y lo representa Aruba durante e siman importante aki.
Prome Minister a indica cu e punto principal di su participacion ta e maneho di Gabinete Wever-Croes pa pone e ser humano central. E importancia pa bay te New York pa papia riba e tema aki e siman aki ta pa motibo cu Gobierno di Aruba ta buscando inversionistanan pa yuda cu e vision di Gabinete Wever-Croes aki. E Asamblea General ta e congreso di nivel mas halto di mundo pa locual ta participacion di mandatarionan y decisionnan crucial cu ta wordo tuma durante e siman aki pa locual ta trata siguridad, paz den region, cambio di clima, proteccion di medio ambiente y desaroyo social, entre otro temanan.
Un tema di debate cu tin atencion di mundo henter den e Asamblea General ta e ‘Sustainable Development Goals’(SDG’s). Esaki ta e metanan cu Nacionnan Uni a establece 3 aña pasa pa caba cu pobresa den mundo y cu ta duna oportunidadnan igual na tur hende. Esaki, Prome Minister a enfatisa, ta hustamente e curason di maneho di Gabinete Wever-Croes: pone e ser humano central y crea oportunidad pa tur hende.
Dialuna mainta, Prome Minister a oranisa den nomber di Aruba un reunion riba e topico di Innovacion Social: Con pa pone e ser humano central ora ta maneha un pais. Prome Minister a comparti e plan di maneho di Gabinete Wever-Croes di e retonan cu Pais Aruba tin y kico ta e solucionnan cu ta wordo aplica. For di varios representante di diferente pais, a ricibi informacion con nan ta atende cu e retonan di nan pais cu no solamente lo yuda pa mehora relacionnan sino tambe e plan di gobernacion di Gobierno di Aruba.
Prome Minister a hiba palabra tambe durante e reunion cu ECLAC, EU y OECD. ECLAC ta un organisacion cu ta yuda paisnan den Caribe y Latino America. EU y OECD ta insistutonan cu ta percura pa e sistema di impuesto di cada mi pais no tin mucho concurencia falso. Aruba ta hayando hopi presion di OECD den e ultimo temponan. Prome Minister a splica den e reunion aki cu Aruba ta un isla chikito cu hopi retonan den cua Gobierno di Aruba ta purba cumpli mas tanto posibel. OECD por yuda si nan baha e presion un tiki y tene cuenta cu como un isla chikito nos ta un tiki mas vulnerabel cu paisnan grandi por lo tanto tambe, tin mester di mas tempo pa antende cu nos asuntonan. Nos mester mas espacio di organisacionnan internacional pa nos vense tur nos retonan y sosten pa ehecuta nos plannan. Awo, nan ta midi Aruba igual cu paisnan grandi entre otro Francia y Alemania. Prome Minister a enfatisa cu no por compara nos economia cu e paisnan grandi aki.
Un otro reunion hopi importante cu Prome Minister a atende tawata cu e Presidente di IMF, señora Christine Lagarde y Secretario General di Nacionnan Uni, señor António Guterres. E tema di e reunion aki tawata e financiamento di e vision di ‘Sustainable Development Goals’(SDG’s).
Dialuna anochi, Prome Minister a reuni cu e delagacion di Hulanda, Premier Mark Rutte, Minister Stef Blok, Minister Sigrid Kaag, Minister Ank Bijleveld y Reina Maxima. Hunto cu Prome Minister di Sint Maarten Leona Marlin-Romeo, a informa riba e desaroyonan mas recien di cada pais.
“Esakinan ta e reunionnan cu mi a atende dialuna henter dia. Ainda tin hopi reunion durante e siman aki. Mas o menos 30 reunion tin plania riba agenda. E reunionnan ta bayendo hopi bon y cu hopi comprension pa pais Aruba. Principalmente ta nota e aprecio y elogio cu demas pais presente tin pa Aruba pa e forma cu nos Gobierno ta atende cu e retonan. Berdad e retonan financiero ta importante, pero di nos banda nos a mustra nan cu ta mas importante pa pone e ser humano central cu pa percura cu no tin deficit mas”, Prome Minister Evelyn Wever-Croes a duna di conoce.