Parlamentario Arthur Dowers a mustra cu tanto reaccion di Minister O. Oduber como ex minister Marisol Lopez Tromp, no ta contene sinceridad ni cu nan mes y ni cu pueblo ya cu fuera di a otorga e derecho di erfpacht pa 60 aña largo cual no por wordo kita mas for di e hendenan aki, Marisol a otorga tambe un pida tereno di e ‘wetland’ cu mester a sirbi como stacionamento mirando e espacio limita pa esaki.
“Pa e motibo aki gobierno di AVP a bisa nan cu mester sinta na mesa pa negocia pa mira si lo por cambia cierto cosnan na bienestar di pueblo. A dicidi di scucha e grupo pasobra e ‘erfpachtrecht’ a wordo duna cu e derecho pa construi un parkeerplaats den wetland.
E intencion di e negociacion e tempo ey tabata pa mira con por kita e pida di ‘wetland’ for di e grupo, pero niun momento Sevinger a duna nan e tereno.
E tabata den nan man caba, inclusive e parti di wetland cu despues Marisol mes ta cana grita cu no por duna tereno den wetland pero ta e mes a duna nan.
Mi colega no a firma nada cu a duna of cambia algo legalmente na e derechonan aki. A bay di acuerdo pa sinta negocia pa mira kico por cambia na beneficio di e pueblo, pasobra Marisol a pensa na beneficio di e compania y no di e pueblo.
Awor sr. Otmar Oduber ta bin dilanti bisa cu ta Benny Sevinger a duna tereno y e mester a negocia esaki. Stop di gaña, stop di gaña y e meneer aki tin un necesidad sumamente grandi di mustra manera comosifuera el a logra algo pa pueblo.
E tin un dolor pasobra tur loke e ta haciendo ta proyectonan di Benny Sevinger. Pa Otmar Oduber e persona di Benny Sevinger ta un “nightmare”, pasobra tur dia e lanta y tin algo pa haci, e ta mira Benny Sevinger su dilanti.
E realidad di bida ta cu e Gobierno cu a baha a traha y a laga tur proyectonan cla y loke cu e mester a haci, ta ehecuta nan y esey ta e dolor di Oduber cu cada bes e ta mira y scucha e nomber di Benny Sevinger.
Mi ta reta Otmar Oduber, Dangui Oduber y Marisol Lopez Tromp sali y mustra prueba caminda cu Benny Sevinger a duna e tereno aki na Marriott of Caledonian. Mustra e documento original cu e firma di Benny Sevinger.
No presenta c’un carta cu tabatin un negociacion entre DIP y Marriott Hotel, cu ta doño di e tereno y no Walter Stipa. Mi ta haya hopi straño di mira Walter Stipa sinta na mesa hunto cu e dos Odubernan ta firma MOU si e no ta doño di e tereno.
Oduber debe pueblo un contesta di kico a palabra, trece e MOU den Parlamento y trece prueba legal cu Benny Sevinger a duna e tereno aki y mustra pueblo cu boso a haci algo pa mehora e condicionnan cu Benny Sevinger lo a duna e grupo.
Tur hende keda pendiente pasobra Benny Sevinger ta un bahul di documento e tin y lo sigui desenmascara e gañadonan di POR. Gañadonan cu a uni cu Evelyn Wever Croes, conoci como 1 april, pa sigui gaña pueblo.
Boso a gaña pueblo cu boso ta bay haci hopi cos y niun boso a cumpli cu nan. Pa keda den Gobierno ta sigui gaña pueblo a costo di hende drechi manera Benny Sevinger cu ta un politico cu a traha pa pueblo.
Boso no a pasa Benny un fastball ni “maleta de rosas” pa cambia e condicionnan. Boso apenas tin un par di luna sinta ya boso a cambia cosnan. Un abuso ta wordo cometi y Evelyn Wever Croes ta keto, kende tabata grita den oposicion cu mester para e cos aki y bin cu moratorium. E Parlamentarionan nobo y sabi cu ta sostene Gobierno, integro y transparente, tur ta keto.
Di dia cu nan a cuestiona e dealnan di SERLIMAR cu no ta sirbi y a haya wanta, tur a keda keto. Nos si no ta keda keto,” Parlamentario Benny Sevinger a sigura.