Cu honda pena y dolor partido MEP a ricibi fin di siman ultimo e noticia di fayecimento di un gran baluarte Arubano sr. Felix Flanegien. Sr. Flanegien a nace riba 14 di September 1944 y tabata un maestro di scol cu su hoofdakte obteni na Hulanda. Riba peticion di lider di MEP Betico Croes, na aña 1975 Felix a aparece pa prome vez como candidato riba lista di nos partido, representando su districto stima Noord. Asina el a sigui aparece riba nos lista na 1979, 1982, 1983, 1985, 1989, 1993 y 1994. Cu e trayectoria impresionante aki den politica Felix a demostra su lealtad incondicional na su partido. Debi na su capacidad y dinamismo Felix Flanegien a keda eligi na april 1981 como diputado di Teritorio Insular di Aruba y a ser encarga cu e departamentonan di Enseñansa, Salubridad Publico, Archivo, Censo y Servicio Informativo di Gobierno. Desde 1979 te cu 1985 Felix Flanegien tabata miembro di Eilandsraad, di 1986-1997 miembro di Parlamento di Aruba y tambe el a fungi durante 1989-1994 como Presidente di Parlamento.
Schouder cu schouder y cu un lealtad incondicional el a lucha hunto cu Betico Croes den e logro di nos Status Aparte. Su espirito di lucha, dedicacion y fieldad na nos partido lo keda pa semper graba den nos curason. MEP ta desea forsa na henter su famia. Cu Felix sosega na paz den brasa di nos Señor.