Recientemente dia 18 di September 2018 a sali publica den prensa cu gobierno lo a firma un MoU cu St. Regis Hotel pa construccion di un Hotel 5 strea di 200 camber situa na Palm Beach, banda di Riu Antiyas (Ex- Concorde Hotel). Den cuadro di esaki, parlamentario di fraccion MEP, Daphne Lejuez ta manda algun pregunta den direccion di ministernan encarga.
Manera conoci, gobierno a anuncia cu e aña aki desaroyadornan di hotel Desarollos Hotelco lo cuminsa construi un hotel di 5 strea, St. Regis Hotel di 200 camber. Segun declaracion di minister encarga cu infrastructura, esaki ta un proyecto hotelero cu tabata firma caba pa gobierno anterior y cu e gobierno aki a continua negociacionnan. Parlamentario Lejuez ta haci un apelacion na ministronan si por a manda parlamento un copia di dicho Memorandum of Understanding (MoU) firma cu St. Regis Hotel dia 18 di september 2018. “Ministronan a informa parlamento cu no por para construccion di 1000-1500 camber di hotel mas. Ministronan por a informa parlamento si tin otro MoU’s nan cu ta wordo negocia cu e restante desaroyadornan?”, parlamentario Lejuez ta subraya den e carta.
Inversion inicial di 170 miyon dollar
E comunicado riba e anuncio recien aki ta informa cu e proyecto hotelero aki tabata firma caba pa e gobierno anterior, esta Gabinete Mike Eman, y cu e gobierno actual a sigui negocia durante e ultimo seis lunanan pa establece condicionnan rigido pa e desaroyadornan, na unda a logra convence nan pa reduci e cantidad di cambernan di 380 camber di timeshare, pa e cantidad di 200 camber vacacional y 20 residencia, 3 restaurant, spa, piscina y mucho mas. Un inversion inicial di 170 miyon dollar. A wordo indica tambe cu e intencion lo ta pa pone e prome piedra den prome kinsena di december 2018 pa na januari 2019 cuminsa cu construccion di e hotel y aki dos pa tres aña habri e hotel nobo aki. Ministronan encarga a sigura cu lo no haci daño na e naturalesa cu tin aworaki riba e area, cu excepcion di e Warda di Polis cu lo muda mas mey mey entre e High Rise, y e Low Rise hotelnan. Y finalmente e comunicado ta bisa cu si no a negocia, nan lo a bin cu e timeshare di 400 camber. Teniendo na cuenta e seis preguntanan haci di dia 21 di maart 2018 na MinROIM, e contestacion ricibi di e MinROIM sr. Otmar Oduber dia 14 di augustus 2018 riba e seis preguntanan, e dos mocionnan nr. 30 y nr. 31 di dia 20 di april 2018 cu ta trata Kosten-Baten Analyse y Moratorium riba hotelnan y cu a keda aproba door di parlamento, e reaccion den pueblo pa cu e noticia di un hotel nobo, parlamentario Lejuez kier a haci algun pregunta na ambos ministro.
Preguntanan
1. Ministronan por a informa Parlamento si gobierno a ehecuta caba e dictum di Mocion nr. 30 di dia 20 di april 2018 na unda Parlamento a pidi pa un “Kosten en Baten analyse”y unda ta compara e costo di anula compromisonan pa proyecto hotelero haci versus costo y consecuencia pa nos comunidad di tur e personanan adicional pa cada camber di hotel?
- Si e contesta riba pregunta nr. 1 ta afirmativo, Ministronan por a manda e “Kosten en Baten analyse” aki pa Parlamento dentro di 48 ora?
- Si e contesta riba pregunta nr. 1 ta negativo, Ministronan por a informa Parlamento kico ta e motibo(nan) cu no a cumpli ainda cu e Mocion aki y dicon no a informa Parlamento al respecto?
- Ministronan por a informa Parlamento con leu gobierno ta pa cu ehecucion di Mocion nr. 31 di dia 20 di april 2018 pa institui un moratorio pa hotel, timeshare y condominio nobo, cu excepcion di “Boutique Hotels” di entre 75-150 camber SIN posibilidad di expansion y cu exclusion di e area pariba di brug cu ta encera tambe LRO y formulacion di un ROP nobo y e ROPV?
- Ministronan por a informa Parlamento cu cual otro desaroyadornan Gobierno ta negociando y cu tambe tin un proyecto hotelero firma caba pa e gobierno anterior di Gabinete Mike Eman?
- Ministronan por informa Parlamento di cuanto camber cada un di e desaroyadornan aki tin pa construccion segun nan plannan?
- Ministro ROIM sr. Otmar Oduber a contesta riba e preguntanan haci cu tin un investigacion forensico andando na DIP. Ministro por informa Parlamento si mientras tanto e investigacion aki a termina?
- Si e investigacion forensico na DIP aki a termina, Ministro por a manda e resultado final di e investigacion aki pa Parlamento?
- Ministro por a manda Parlamento un lista completo di tur e terenonan erfpacht cu a wordo otorga pa hotel, condominio manera describi den pregunta nr.1 di preguntanan haci dia 21 di maart 2018 na Ministro ROIM sr. Otmar Oduber?
- Ministro ROIM sr. Otmar Oduber por a contesta pregunta nr. 2 di e preguntanan haci dia 21 di maart 2018?
- Gabinete Mike Eman a otorga 7 mil camber adicional pa construccion di hotel y condominio, di cual Ministro a informa Parlamento cu e construccion di alrededor di 1000-1500 camber no por wordo para mas. Ministro ROIM por informa Parlamento di cual desaroyadornan specifico esakinan ta?
- Ministro por duna Parlamento un splicacion amplio y al caso kico ta e motibo(nan) pakico e 1000-1500 cambernan aki NO por wordo para mas?
- Den programa di gobernacion “Hunto pa Aruba” e gobierno actual kier reglamenta via ley un moratorio pa pone un paro definitivo na expansion di hotel-condominio. Ministronan por informa Parlamento con leu gobierno ta pa cu ehecucion di dicho ley di moratorio y den ki fase esaki ta actualmente?
- Ministro por informa Parlamento si mientras cu dicho ley ta den proceso, si gobierno (MinROIM y MinTVS) a implementa un maneho (beleid) pa paro na expansion di hotel-condominio? Parlamento por a haya copia di dicho maneho?
- Ministronan por a informa Parlamento kico e condicionnan “rigido” cu a impone riba e desaroyador di St. Regis Hotel ta encera?
- St. Regis Hotel lo bay tin 3 restaurant tambe. Ministronan por a informa Parlamento cuanto restaurant tin den total aki na Aruba? Cuanto restaurant tin reparti den e 6 districtonan di nos isla? Ki tipo di restaurant nan ta (cuminda internacional of local)? Cuanto trahador den total tin trahando cu e restaurantnan aki? E restaurantnan aki ta cumpliendo debidamente cu nan obligacionnan na SVB y Belastingdienst?
- Ministronan por informa Parlamento cuanto restaurant a cera of a bay failliet durante e periodo di januari 2010 te cu augustus 2018?
- Cual ta opinion di Ministronan respecto e cantidad y variacion di restaurantnan -den y banda- di e hotelstrip existente caba y e impacto di di otro 3 restaurant adicional na esnan existente?
“Ta haci apelacion na ministro si por a informa parlamento si por spera mas MoU of cualkier otro tipo di formalisacion prome cu finalisacion di e tarea di Capacidad di Carga caba cu nan tarea”, segun parlamentario Lejuez ta detaya. Suscrito ta desea di ricibi contesta por escrito riba tur e preguntanan conforme e periodo stipula pa e Reglamento di Ordo di parlamento di Aruba, gradiciendo ministronan di antemano pa nan cooperacion.
