ORANJESTAD – Celebracion di Dia Mundial di Turismo ta un ocasion den cual Oficina di Turismo ta tuma e oportunidad pa, no solamente conscientisa comunidad riba e importancia di e industria pa nos pais y celebra tur e individuonan cu nan trabou diario ta carga esaki; pero tambe pa comparti conocemento cu ta habilita tur partido envolvi pa alcansa e obhetivonan di ‘best practices’. Dia Mundial di Turismo ta celebra riba 27 di september y en conexion cu esaki, A.T.A. ta organisa su conferencia anual caminda e aña aki ta enfoca riba transformacion digital y turismo y con esaki ta impacta bida di un y tur.
A.T.A. ta tuma nota con avancenan digital ta transformando e manera con nos ta conecta y informa nos mes, transformando nos manera di haci cosnan, y curashando innovacion. Como tal, e entidad di maneho y promocion di Aruba como destino turistico ta reconoce cu ta esencial pa compronde e impactonan economico, social y ambiental di tecnologia y innovacion den turismo.
‘Turismo y e Transformacion Digital’ ta e tema internacional segun United Nations World Tourism Organization pa e Dia Mundial di Turismo 2018. Di acuardo cu e tema, e conferencia riba e dia aki ta conta cu presentacion di dos orador experto den e tereno. E prome ta Daniel Newman kende ta e analista principal y socio fundador di Futurum Research y ademas ta CEO di Broadsuite Media Group. E ta traha cu e marcanan mas grandi di tecnologia explorando transformacion digital y con esaki ta influencia comercio. Tambe lo ta presente Sam Sheffer, kende ta traha cu companianan grandi di media specialisa den tecnologia, por ehempel, Engadget, The Verge y Mashable, ocupando diferente funccion, entre nan social media manager, creador di contenido, fotografo, escritor, productor y editor.
Contenido di e conferencia ta basa riba con un sector turistico cu ta digitalmente avansa por mehora iniciativanan empresarial, inclusion y participacion di comunidad local, y maneho eficiente di recursonan, entre otro obhetivonan importante di desaroyo. E proposito di Dia Mundial di Turismo di e aña aki ta pa yuda nos explora mas ainda e oportunidadnan cu tin den turismo danki na e avancenan tecnologico manera big data, inteligencia artificial y plataformanan digital.
Di awo caba A.T.A. ta desea tur miembro di sector turistico un feliz Dia Mundial di Turismo. Tuma e momento pa refleha y renoba nos compromiso pa cu profesionalismo, nos nivel di servicio y pa cu brinda e miho experiencia posibel na tur bishitante cu nos isla ta ricibi.