Lo busca formanan pa traha hunto y sigui apoya nos empresanan chikito y mediano
ORANJESTAD – Ayera merdia Aruba tabata cede di e summit Post COSME na Renaissance Convention Center. Despues di un dia cu diferente presentacionan di diferente expertonan internacional, ministro di Finanza, Asunto Economico y Cultura sra. Xiomara Ruiz-Maduro a firma un declaracion pa sigui cu e cooperacion entre LGO nan den Caribe pa busca formanan pa traha hunto y sigui cu e apoyo na nos empresanan chikito y mediano manera cu COSME.
Otro dignatarionan presente pa firma tabata ministro di Desaroyo Economico di Corsow, sr. Steven Martina, Ministro di Salud, Agricultura y Servicionan Humano di Turks and Caicos sr. Edwin Astwood y diputado di Boneiro sr. Hubert Martis.
Sra. Diana Hendrickson di GOPA a presenta varios proposicionan pa continua cu e trabaonan di COSME y colaboracion entre e diferente islanan LGO den Caribe. Parti di e presentacionan a tuma lugar via digital unda diferente expertonan desde nan pais a trece temanan manera; con pa crea un e-commerce platform, creacion di un LGO regional think tank, funcionamento di un LGO helpdesk na CAIPA y mucho mas.
Secretario General di CARIFORUM sr. Percival Marie a duna via skype un speech riba relacionan entre LGO- EU -CARIFORUM y sra. Taiana Mora a duna un relato riba diferente posibilidadnan pa e LGOnan den region traha huntu cu CARIFORUM teniendo na cuenta experiencianan di pasado. Sra. Mora a trece dilanti e importancia pa cada isla determina nan prioridadnan y hunto busca interesnan comun como LGOnan den Caribe. Otro representantenan di gobierno di Anguilla, Corsow, Boneiro, Turks and Caicos y Aruba tabata presente. Presidente y directora di Camara di Comercio di Aruba, sr. Ernst Mohamed y sra. Sonja Velthuizen a participa como stakeholders di e programa COSME y pa duna nan sosten na e continuacion di e cooperacion den region cu ta crea oportunidadnan pa empresarionan.
Sra. Vanessa Tore directora di Ministerio di Desaroyo Economico na Corsow y sra. Maria Dijkhoff-Pita, directora di Departamento di Asunto Economico, Comercio y Industria Aruba conhuntamente cu representantenan di e otro islanan lo bay sigui traha riba formanan pa continua cu e cooperacion y sigui apoya e empresanan chikito y mediano den Region.
Ministro di Finanzas, Asunto Economico y Cultura ta enfatisa e importancia di empresanan chikito y mediano na Aruba y cu IDEA y Exprodesk lo sigui duna e apoyo necesario na nos empresarionan.
