Durante e siman aki, Minister President di Aruba, Evelyn-Wever-Croes, lo participa den e Assamblea General di Nacionan Uni (UNGA 73) na New York. E Asamblea General ta e congreso di nivel mas halto di mundo pa locual ta participacion di mandatarionan y decisionnan crucial cu ta wordo tuma durante e siman aki pa locual ta trata siguridad, paz den region, cambio di clima, proteccion di medio ambiente y desaroyo social, entre otro temanan.
Awe dialuna, Minister President ta cuminsa un serie di 30+ reunion. E mandatario a organisa un ‘side event’ den colaboracion cu Nacionnan Uni cu ta un reunion dirigi rib’e retonan di Aruba. E reunionnan di awe lo trate e ‘Sustainable Development Goals’(SDG’s) y innovacion, dirigi rib’e ser humano. Gabinete Wever-Croes tin un maneho social hopi prominente y ta un ehempel pa otro paisnan. Aruba ta reconoci mundialmente y pa Nacionnan Uni como un modelo ehemplar (‘best practice’) y asina nos ta spera di por atrae fondo pa yuda nos den implementacion di SDG’s. Na e ‘side event’ aki varios pais prominente ta invita y asina nos ta profila Aruba riba tarima internacional.
“Cu e diferente reunion y presentacionnan nos ta spera di gara e atencion di comunidad internacional y logra financia mas proyecto cu nos mes no por financia debi na e situacion financiero. Nos ta ganando confiansa di comunidad internacional pa e forma determina cu nos Gobierno ta poniendo e ser humano central”, Minister President a duna di conoce.
