Seroe Colorado/ De Vuyst: Dialuna den oranan di mainta autoridad policial hunto cu kustwacht ta logra detene en total 14 persona cu lo a drenta Aruba ilegalmente via lama.
Den Colony den oranan di mainta nan ta topa cu un grupo di persona canando den Colony y ta detenenan.
Despues di un buskeda intenso net poco pariba di e crusada unda Ex Costa Riba Restaurant tabata ta, Kustwacht ta topa cu dos homber ilegal, mesora nan ta detenenan, riba e fotonan por mira un homber cu un petchi di Canada bisti, kende na e sitio a admiti cu esaki no ta su prome biaha, pero cu esaki ta su di tres of cuatro biaha cu e ta drenta Aruba ilegalmente, pero cada biaha mala suerte ta toca su persona cu e ta wordo gara.
Algun minuut despues un otro grupo di 6 a wordo gara, ta papia cu nan tin of algun tin dos dia caba ariba e isla scondi.
Tur a wordo poni den man di Guarda Nos Costa.
Gobierno a hinca hopi placa den vehiculonan special pa core y controla costa. Pero cada biaha ta keda haya sorpresanan.
E gruponan aki di Venezuela ta keda drenta bou nanishi di autoridad y pa awor tanten cu no pone radar y of helicopter nada lo no cambia.
Notabel ta, cu e gruponan nan aki sa exactamente ki ora nan por drenta. Con nan sa? Ta un pregunta cu a wordo haci hopi biaha.