ORANJESTAD – Manera cu el a indica durante su conferencia di prensa recientemente, Parlamentario Sue-Ann Ras (MEP) a elabora riba e Pre-Universitario Skol Avansa Integra Humanista (SKAIH) na Corsou. E tabata di bishita na e isla bisiña recientemente y a conoce e scol mas di cerca. SKAIH ta un scol riba nivel di HAVO/VWO, mescos cu e otro scolnan, pero cu diferencia cu e alumnonan ta haya les na Papiamento y Ingles. Segun Ras, ta di lamenta cu 40% di poblacion mundial no tin acceso na educacion den un lenga cu nan ta uza diario y ta compronde. Y segun Ras, Aruba tampoco no ta un excepcion.
INICIO DI AÑA ESCOLAR 2018-2019
SKAIH Pre-Universitario a inicia su prome aña cu 23 alumno y sigur nan tin un reto extra. Aunke nan ta siña Hulandes tambe, e lesnan no ta na Hulandes, pero na Papiamento y Ingles. E alumnonan ta haya e mesun materianan cu e alumnonan di otro scol di HAVO/VWO na Corsou. Durante e les tanto alumno como docente ta papia Ingles, pa asina custumbra cu e idioma aki. Banda di esey, e alumnonan cu ta sigui enseñansa bilingual ta participa na diferente actividad, pa eleva nan dominio di Ingles.
ENSEÑANSA BILINGUAL
Ras ta mustra cu idioma ta yabi principal pa haci comunicacion posibel. Despues di algun investigacion cu Fundacion Scol Humanista na Papiamento (FSHP) a laga haci, a indica cu e idioma di Ingles ta loke mas ta biba y uza cerca e hobennan como comunidad. Ingles ta un idioma hopi importante y mas y mas den nan comunidad, e ta birando e medio di comunicacion na cualkier trabou. Loke cu segun Ras a resalta ta, cu como yiu di Corsou ta importante pa nan realisa tambe cu mundo no ta caba na Punta Kañon of Watamula. Internacionalisacion mescos cu desaroyo di identidad propio ta forma parti integral di formacion na SKAIH Pre-Universitario. E principio ta pa e muchanan cu ta lanta na Corsou, conoce tur aspecto di nan pais y cultura y asina desaroya nan identidad como yiu di Corsou. Pa nan ta creativo, innovativo y sin miedo pa enfrenta mundo y cu nan tin gana di aporta na desaroyo di comunidad. Pa e muchanan tin sentido patriotico, respet pa nan bandera y himno y bon conocemento y comprension di nan historia.
NORMA DI CALIDAD
Ras a splica cu pa por garantisa calidad y nivel di estudio di nan scol, nan a bira miembro di e red di e scolnan bilingual di NUFFIC (De Nederlandse organisatie voor internationalisering in onderwijs). NUFFIC ta e instituto cu ta fiha e normanan di calidad pa enseñansa bilingual, tanto na Hulanda como otro parti di Europa y pa por keda acredita, mester cumpli cu un cantidad di norma. NUFFIC tambe ta conoci na Aruba, ya cu nan ta esunnan encarga pa haci reconocemento di diploma.
SUBSIDIO
Gobierno di Corsou ta subsidia e scol, na mes manera cu e otro scolnan di HAVO y VWO. Depende di e cantidad di subsidio di parti di Gobierno, e mayornan kisas mester aporta pa aña cu un contribucion financiero rasonabel pa e actividadnan pafor di scol.
EXAMEN HAVO
E alumnonan lo pasa examen di Caribbean Examination Council (CXC), cu ta e Conseho di Examen Caribense altamente aclama den y pafo di nos region. Esaki ta e mesun sistema cu Saba y St. Eustatius ta uza. Na final di e prome dos añanan di formacion basico (klas 1 y 2), e alumnonan ta haya un certificado di CXC: CCSLC (Caribbean Certificate of Secondary Level Competence) como prueba cu nan a finalisa formacion basico. Na final di 5 aña (klas 5) e alumnonan ta pasa examen di CXC pa haya e CSEC; Caribbean Secondary Education Certificate y diploma di SKAIH. NUFFIC ta balora e examen aki na nivel di HAVO.
EXAMEN VWO
Despues di Havo, e alumnonan por sigui e programa di 2 aña di International Baccaluareate Organization (IBD), cu a keda valora pa NUFFIC riba nivel di VWO. “ E diploma aki cu e alumnonan aki haya, ora nan caba IBD, ta duna nan acceso entre otro na e miho universidadnan na Europa incluso Hulanda y Merca”, Ras a sigui bisa. E parlamentario ta contento di por a bishita e facilidad aki y experiencia personalmente con esaki ta opera.
