Diahuebs atardi Minister di Deporte Sr. Dangui Oduber hunto cu parlamentarroo Sr Edgard Vrolijk tabata presente na veld di S.V. Estrella den e bario di Papilon.
Minister Dangui Oduber a haci entrega di un bunita reconocimento na e directiva di S.V. Estrella den cuadro di nan 70 aniversario cu nan a cumpli 2 di September ultimo.
Estrella no ta un ekipo desconoci den e deporte di futbol na Aruba. Estrella a competi den division di honor casi ful su existencia y a titula campeon na varios ocasion. Dos ekipo na aruba so a logra gana copa Antillano y Estrella tabata un di nan cu a logra e titulo aki na aña 1970. Deporte ta tene nos hobennan activo y riba e bon caminda, asina e mandatario a trece dilanti. Como toke di aprecio pa tur e añanan cu S.V. Estrella a dedica na deporte Minister Dangui Oduber a haci entrega di 60 bala di futbol na e club.
Finalmente Minister Dangui Oduber a manda palabra di pabien y gradicimento na e directiva, miembro y ex-miembro nan di S.V. Estrella. Minister ta hopi agradecido na tur e voluntarionan cu ta duna di nan tempo liber pa guia y desaroya nos hobenan. Esaki ta algo di aprecia pasobra ta hopi tempo y energia ta bai na tur training y wega y ta sumanente importante pa tin e voluntarionan aki cu tin curason pa deporte. Danki na bosonan pa yuda communidad den loke boso ta haci.