Si di 2009 pa 2013 e no tababa Minister President mi por a compronde e ‘show’ di rueda di prensa di Lider di partido AVP. Un show pa un audiencia cu kizas ainda e ta kere e por bende un 9 pa un 6 pero mi ta convenci cu Pueblo hamas por lubida cu den apenas algun aña el a redobla e debe di Pais Aruba ocacionando no solamente un desaster financiero pero tambe a laga como herencia un pais den crisis! Awe Mike Eman un biaha mas kier tuma pueblo pa kens. Ta bon pa Mike Eman informa pueblo dicon durante e 8 aña di Gobierno di AVP I y II el a ignora conseho y avisonan di diferente instancia manera Algemene Rekenkamer, Raad van Advies y Banco Central di Aruba.
Na 2009 el a haya un pais cu un debe di 49% di nos GDP y a lag’e atras na un porcentahe hamas bisto di 93% di nos GDP. Despues cu e gobierno actual haya un bista real ariba e situacion financiero di pais Aruba a bin resulta cu na lugar di a haya un pais cu un deficit presupuestario di 0.5%, manera AVP a informa, e deficit a bin resulta di ta 155 miyon florin na lugar di 25 miyon florin.
Awel awe nos por bisa cu a bin un fin na manipulacion ariba papel caminda cu AVP pa cumpli cu normanan stipula a aplica hopi creatividad y pronosticonan irealistico. Lastimamente e cuenta di e debe yama “AVP bon trabou” di cual Mike Eman te dia di awe ta masha orguyoso di dje, ta pueblo mester paga pe!
Un bon trabou cu a conduci na un pais den crisis. Un crisis cu ta keda refleha no solamente den un debe astronomico di mas cu 4 biyon florin cu nos yiu y nan yiunan tin cu bay paga pe pero tambe den entre otro, un economia stanca desde 2015, desempleo bou di nos propio hendenan principalmente nos hobennan, caminda 1 di cada 4 hoben ta desemplea; un pais caminda norma y balornan a bay perdi; un pais caminda abuso y maltrato di mucha ta tuma lugar na un cantidad alarmante; un pais caminda violencia domestico, abuso y maltrato contra nos hende muhernan ta demasiado halto; un pueblo cu ta biba cu miedo y cu no ta sintinan mes safe den nan mesun cas; un grupo grandi di personanan cu problema di adiccion y problema di salud mental y hopi famia kibra.
E situacion laga atras ta un situacion alarmante caminda e tristo realidad ta cu pa atende cu e diferente problemanan social aki na Aruba ta papia di listanan di espera. Un lista di espera di 2 pa 6 luna na Sociale zaken, di mas cu 1 aña na Bureau Sostenemi, di 120 persona na Voogdijraad y asina mi por keda menciona.
Contrario na loke AVP ta bisa, Gobierno actual no a anuncia un crisis social. Nos hendenan ta bibando e crisis social! Cifra y rapportnan ta demostra esaki. For di reunionnan cu diferente instancia, departamento y fundacion cu ta traha den e veld social un cos ta resalta esta nan grito pa atencion. Nan ta grita pa inversion…..mas cu tur cos nan ta grita pa nos mucha y hobennan, pa nos famianan, pa e decadencia cu nos pais ta aden. Den diferente rapport di e veld social e crisis social ta keda constata. Awor na 2018 nos ta cosechando e falta di inversion y atencion den e area social.