Pa falta di vision, pa falta di seriedad y capacidad pa atende cu asuntonan di interes grandi pa nos pueblo, gabinete Wever Croes ta causando problemanan serio y sumamente delicado, lider di fraccion di AVP, sr Marlon Sneek ta mustra.
Entre otro sr Sneek a mustra cu tin un carta cu WEB a manda pa Utilities Aruba NV relaciona cu tarifa di awa y riba e situacion cu e compania di ultidad ta pasando aden den ultimo lunanan, y fraccion di AVP a dirigi pregunta na gobierno riba dje y a pidi copia di e carta menciona.
Pero apesar di e peticion haci, Gobierno te ainda no a manda e carta pa Parlamento pero si por a nota cu Prome Minister ta trata di pretende cu e no tabata sa di e carta aki y cu e lo no kier papia mes di aumento di prijs di awa y coriente.
“Fraccion di MEP ta trata di silencia bos di AVP den Parlamento, entre otro dor di kita e presidencia e comisionnan di empresanan estatal for di e fraccion berde.
Motibo di tur esaki ta pasobra e siguiente paso cu fraccion di AVP tabata pa tuma, si no haya un copia di e carta, ta pa yama un reunion cu WEB Aruba NV.
Ya caba nos a pidi un ‘openbare bijeenkomst’ pero e no a wordo honra mescos cu no a haya e carta, apesar cu Gobierno aki for di inicio a priminti pueblo di lo ta transparente.
Awe nos ta mira cu nos no por haya e documentonan di WEB y loke si nos por a scucha ta cu WEB ta coriendo den deficit pa loke ta su presupuesto 2018.
Otro informacion ta bisa cu e deficit aki ta 20 miyon florin caba cu WEB tin como gasto extra, cual nan no tin forma pa cubri. Nan ta haciendo nan ehercicio pa mira for di unda por haya e placa aki pa cumpli cu nan presupuesto.
Henter e situacion aki crea pa prome minister mes cu ta encarga cu e compania di utilidad aki, ta pone un cantidad grandi di trabou di Arubiano na peligro y ta colga na hilo ainda e subida di tarifa di awa y coriente cual, si e sosode, ta pa falta di vision y maneho di gabinete Wever Croes. Tur esaki basa riba e decision di Gobierno cu a dicidi cu WEB no “hedge” y esaki ta e motibo cu e gastonan pa WEB ta aumentando.
Prome Minister ta busca manera di hunga netchi bisando cu prijs di awa y coriendo no ta bay subi ainda, cual aumento por ta mañan of aki un luna y nos ta lamenta cu e Prome Minister no ta sincero cu comunidad. No ta bisa comunidad kico ta pasando.
E problema ta sinta den e hecho cu ora e prijs di fuel tabata 40 dollar gobierno a dicidi cu no ta “hedge”, pero e prijs di fuel a sigui subi cu e consecuencia cu awe pueblo mester paga mas pa producion di awa y coriente.
Prome Minister no ta duna cara den e asunto aki, mucho menos transparencia y tin tur indicacion cu e cifra di 20 miyon di deficit lo sigui subi y lo tin consecuencia pa e compania estatal aki. Prome Minister mester bisa kico ta pasando, pa tuma accion y garantisa cu e compania di WEB ta keda stabiel, y garantisa cu pueblo ta haya un miho prijs di awa y coriente,” Parlamentario Marlon Sneek a mustra.