Home » Departamento di Asunto Social a atende 308 cliente dialuna ultimo

Departamento di Asunto Social a atende 308 cliente dialuna ultimo

by Admin
0 comment 85 views

ORANJESTAD – Dialuna 10 di september ultimo a tuma luga e dialuna di blokeo mas grandi di aña 2018 na Departamento di Asunto Social (DAS).

Tur luna despues di pago di bijstand ta dialuna di blokeo, pero tur aña despues di e pago di bijstand di luna di september, na cual Gobierno ta duna un ayudo financiero extra na tur persona den bijstand entre 4 te cu 24 aña cu ta bay scol regular durante dia, ta conoci di ta e dialuna di blokeo di mas druk.

Durante e pago di bijstand di luna di augustus, tur cliente a haya un carta pega na nan recibo di bijstand. Den e carta aki tabata tin un splicacion amplio, hunto cu tur otro informacion necesario tocante e pago di ‘school uitkering’ y ‘ouderlijke bijdrage’ pa aña escolar 2018/2019.

Durante luna di augustus na mas di un ocasion, Gobierno di Aruba hunto cu Departamento di Asunto Social a organisa diferente conferencia di prensa y a manda diferente comunicado di prensa, pa asina recorda tur persona den bijstand riba e deadline pa entrega ‘schoolverklaring’. Tur esaki, pa evita blokeo di nan bijstand y cu consecuencia cu nan lo mester presenta riba dialuna 10 di september na DAS.

E aña aki DAS a traha proactivo pa asina purba di acomoda tur cliente di bijstand un poco mas confortabel door di pone tent, stoel y awa disponibel. Tambe DAS a ricibi cooperacion for di Rode Kruis Aruba, ken a ofrece asistencia di EHBO durante cualkier incidente.

DAS a haci su maximo esfuerso pa informa tur su clientenan di bijstand pero na su turno e clientenan tambe mester asumi nan responsabilidad, pa asina evita cualkier inconveniencia. Pesey Departamento di Asunto Social kier sigui recorda tur su clientenan di bijstand, pa semper cumpli cu tur e responsabilidad cu bijstand ta trece cu ne y alabes informa seccion di bijstand cualkier cambio cu por tin influencia riba e bijstand, esaki pa evita cualkier inconveniencia na momento di cobra.

Pa cualkier pregunta of informacion, por semper tuma contacto cu Departamento di Asunto Social na telefon 528-1100 (yamada ta gratis) of ‘like’ nos pagina di Facebook ‘Departamento di Asunto Social’ y keda na altura di tur noticia y/of informacion.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio