Aña nobo Parlamentario pa 2018-2019 a keda inaugura diamars mainta caminda a sigui cu e tradicion di semper, cu su Excelencia Gobernador dirigiendo su mes na Parlamento y tur invitado, cu e mensahe di e gobierno actual.
Parlamentario pa fraccion di AVP, sr Michael Lampe a mustra cu ora analisa contenido di e discurso, por realisa cu no tin cambio algun den e mensahe cu gabinete Wever Croes ta bolbe duna pueblo, esta un serie di promesanan nobo y bieu, cu nunca a of lo wordo cumpli.
“Tin diferente aspecto of punto interesante cu gobierno mes a apunta den e mensahe aki, caminda entre otro Gobernador a menciona e ‘erosion grandi di norma- y balornan’ cu tin den comunidad aki na Aruba.
Sin duda ta hopi impresionante pa constata cu e actual gobierno di coalision di MEPPORRED, a permiti gobernador hiba e mensahe di e gobierno na pueblo, mustrando cu entre otro cu “nos mester ta honesto y constata cu ultimo añanan riba tur tereno, tin erosion grandi di e norma- y balornan aki.’
Cu esaki gobierno ta referi na cuido di nos medio ambiente, respet y cuido pa nos prohimo, integridad y transparencia, solidaridad y responsabilidad, cu ta loke nan a propone como nos identidad.
Palabra y expresionnan grandi, di hopi nificacion pero caminda lamentablemente nos tin cu constata cu gabinete Wever Croes ta menciona aspectonan cu su mes no ta respeta of ehecuta como gobierno.
Ora gobierno kier papia di norma- y balornan, ta na su luga pa nos dirigentenan realisa cu nan ta e promenan yama pa combati erosion di nos norma y balornan den comunidad y sigur cu esaki por ser logra unicamente cu honestidad y sinceridad.
Aki tin cu mustra cu gabinete Wever Croes a bay den historia politico di nos pais como un partido cu dirigentenan cu no tabata y ainda no ta sincero cu nos pueblo, sigur ora cu pueblo constata cu practicamente tur loke gobierno aki a priminti durante di campaña, nan no a cumpli cu pueblo.
Un di e fayonan grandi di e gobierno di coalicion y cu a dal pueblo masha duro mes, ta e hecho cu a priminti cu MEP tin solucion pa e situacion financiero di gobierno, SIN cu mester tuma medida y nos actual Prome Minister a sigura pueblo durante di campaña cu medida ta for di discusion ya cu su partido tin e solucion.
Awe pueblo ta drentando su di tres luna sintiendo e efecto grandi di aumento di BBO, e falta di control y proteccion pa diferente aumento di prijs cu ta tumando luga sin hustificacion, mientras cu gabinete Wever Croes ta sigui crea un peso economico y financiero grandi pa nos pueblo.
Promesa di reduccion di gasolin no a cristalisa y tur cos ta mustra cu e prijs lo sigui subi, pa colmo yuda pa gobierno di coalicion cu cobransa adicional di accijns.
Otro promesa di reduccion di prijs di awa y coriente tampoco a tuma luga, al contrario pueblo ta dilanti porta di un aumento substancial manera pronostica pa gerencia di e compania nacional, mientras cu cobransa pa recogemento di sushi ta birando un realidad.
Promesa di soluciona criminalidad, di introduccion di un plan social cu ni e propio gobierno no sa di dje, promesa di reduccion di cantidad di minister, promesa di reduccion di personal, di coordonadonan, net lo contrario a wordo haci.
Erosion di norma y balornan ta algo cu mester wordo combati y reintroduci pero e prome pa haci esaki, e prome pa duna e miho ehempel, ta gobierno y den esaki gabinete Wever Croes a bin ta dunando e pio ehempel cu por tin,” Parlamentario Michael Lampe di fraccion di AVP ta mustra.