ORANJESTAD – E compromiso cu nos grandinan y personanan cu limitacion ta sigui, percurando pa nan ricibi un cuido di calidad. Un acuerdo entre Ministerio di Salud Publico y Ministerio di Sociale Zaken representa pa e organisacionnan di Departamento di Salud Publico (DVG), Departamento di Asunto Social, Stichting Algemene Bejaardenzorg Aruba (S.A.B.A.), Stichting Ambiente Feliz, Stichting Verstandelijk Gehandicapten Aruba (S.V.G.A.) y CEDE Aruba a ser firma cu e meta pa activa e centro di cuido pa personanan cu limitacion.
Mientras cu ya pa casi 10 aña tin tres edificio para bashi na Centro di cuido San Nicolas, tanto S.A.B.A. y Stichting Ambiente Feliz tin e ambicion pa duna mas atencion na e personanan mas vulnerabel den nos pais. Cu sosten di CEDE Aruba Stichting Ambiente Feliz hunto cu S.V.G.A. y Fundacion Guia Mi a prepara un proyecto cu ta enfoca riba e centro di cuido pa nos grandinan y personanan cu limitacion, cu lo opera 24 ora pa dia. Di e forma aki tanto grandi como chikito por ricibi e cuido necesario. Lastimamente, te cu awo, pa motibo financiero, no por a ehecuta e plan aki.
Cu e firmamento di e acuerdo aki, ta crea e posibilidad pa ehecuta e plan di cuido aki riba menciona. Lo bay haci uso di edificionan cu ya caba pa 10 aña ta bashi y cu tin e espacio y capacidad pa ehecuta e plan aki. E plan lo conta cu e financiamento di fondonan di e crisisplan presenta door di Gabinete Wever-Croes I, na unda ya tin placa reserva pa e proyecto di S.A.B.A. hunto cu Stichting Ambiente Feliz. Na inicio di e di tres kwartaal di e aña aki, tur e partidonan envolvi lo sinta hunto pa delinea con lo haci e comparticion y uzo di e facilidad aki. Cu sosten di Departamento di Asunto Social y DVG, lo yega na un concepto di contracto, caminda tur partido lo tin su debido tarea, beneficiando di e forma aki e personanan mas vulnerabel den nos pais.