E fecha12 di september 2018, a marca un momento historico pa cuido pa persona cu limitacion mental y multiple. Den cuadro di e crisis plan social, Minister di Salubridad Publico, Sr. Dangui Oduber y Minister di Asunto Social, Sr. Glenbert Croes, a firma un ‘Memorandum of Understanding’ (MoU) cu partnernan relevante. E MoU aki ta pa ofrece un pasadia y un cantidad di 20 cama pa esnan cu limitacion mental, en particular mucha y hoben, cu ta rekeri cuido intensivo 24 ora.
Originalmente a diseña y construi e facilidad aki di pasadia y e tres unidadnan di cuido localisa na Centro di Cuido San Nicolas netamente pa e grupo aki. Desafortunadamente e Centro di Cuido aki a keda mas cu 8 aña sin ser ocupa. 8 aña largo e lugar aki a keda bashi. Asina importante e problema social y nos hendenan special tabata pa AVP. Un lugar cla construi pa a keda para bashi 8 aña largo.
Pero awor, poniendo e ser humano central, e gobierno actual ta cumpliendo cu e deber y compromiso pa percura pa un bida digno pa esnan mas vulnerabel den nos comunidad. Ambos mandatario a accentua e importancia di percura pa e grupo aki haya un calidad di bida cu ta un encera miho cuido y proteccion.
Minister Glenbert Croes ta manda un palabra di elogio y reconocimento na tur partner envolvi cu apesar di a wordo neglisha pa 8 aña, awe por ta sigur di tin un Gobierno cu ta para nan tras y apoya nan totalmente.
E partnernan cu a colabora pa haci esaki posibel na Centro di Cuido San Nicolas na Palisiaweg ta: SABA, Fundacion Ambiente Feliz, SVGA, Cede Aruba, Departamento di Salubridad Publico y Departamento di Asunto Social.
E proyecto aki ta yena un buraco notabel den e sistema di cuido profesional dirigi na e grupo special y vulnerabel aki.
Aruba porfin tin un Gobierno cu tin e ser humano como su punto di salida den tur su decisionnan.