Diadomingo cu a pasa, Prome Minister Evelyn Wever-Croes haci apertura oficial na e celebracion di Fiesta di Cunuco. Prome Minister a reemplasa Minister di Cultura Xiomara Ruiz-Maduro kende no tawata presente pa motibo cu na ultimo momento como Minister di Finansa a haye obliga pa representa Aruba na un reunion hopi importante na Paris.
Stichting Monumenten Fonds Aruba a celebra e prome lustro di Fiesta di Cunuco na grandi y cu un exito rotundo na cas di cunuco di famia Britten na Calabas 71 na unda a duna realse na nos Herencia Cultural. Na e ocacion aki, Prome Minister a duna un discruso cortico p’asina declara e fiesta habri oficialmente.
“Pa Gabinete Wever-Croes, Cultura ta hopi importante. E ta algo cu nos mester biba. No ta algo cu nos ta papia so di dje sino algo cu mester wordo practica. Den bida nos tur tin retonan. Nos no por bisa cu e bida aki ta facil y sin dolor di cabes. Mescos un pais tambe tin su retonan. Aruba a pasa den retonan grandi den pasado caba. Ora cu bin bek na e rais, y celebra den un ambiente asina na un cas cu tin tanto recuerdo, bo ta para keto un rato y realisa parti di nos historia. Mi a lanta cu parti di famia Britten aki y conoce nan historia. E cas di famia tin bunita historia y ta pone mi corda cu Aruba a pasa den retonan grandi y nos a surpasa nan y cada biaha nos ta sali mas fuerte di nan. Esaki ta haci cultura importante. Pa nos corda unda nos tawata ta, pa nos nunca lubida esey, pa nos bib’e, y pa nos pase pa nos futuro generacionnan.
Mi kier a felicita tur esnan cu ta haci e Fiesta di Cunuco posibel haciendo hopi trabou y pasenshi pa e wordo realisa. Danki di curason den nomber di Gobierno di Aruba y especial den nomber di Minister di Cultura Xiomara Ruiz-Maduro”.