ORANJESTAD, Aruba – 9 di September 2018: En conexion cu Dia Nacional di Cacho, Riu Palace Antillas kier a mustra nan sosten cu SGT Peppers Friends, e shelter cu ta rescata puppies, cacho adulto y pushi for di caya door di organisa un show cu e cachonan na Riu Palace Antillas. E boluntarionan di e shelter tabatin e oportunidad pa splica nan trabou y e proceso di adopta na e bishitantenan como laga nan keda encanta cu e triki- y weganan cu e 8 cachonan cu nan ta cuida. Turistanan a disfruta di e oportunidad pa caricia e cachonan y haya sa mas di e shelter.
E boluntarionan di SGT Peppers Friends y empleadonan di Riu Palace Antillas a parti flyers cu informacion di e shelter. Tambe e shelter a trece un box pa turista haci donacion. Apart di disfruta e show, turistanan tabata interesa den aspectonan manera proceso di adoptacion di bestianan. Lisa Roos, un boluntario di SGT Peppers Friends, a indica cu nan tin mas o menos 150 bestia den casnan “foster”, pero tambe nan ta purba siña hubentud di Aruba con pa trata bestianan y e importancia di opera nan.
Tur hende por pasa na SGT Peppers Friends y adopta sea un cacho of un pushi. Boluntarionan ta percura cu e cacho- y pushinan ta vacuna, nan tin chip y opera. Riu Palace Antillas y Riu Palace Aruba p’e donacion di 10 saco di cuminda, un yudansa cu e shelter ta balora hopi como cu ta importante pa nan ricibi e sosten di compania local.
Pa mas informacion con pa adopta un cacho of pushi por bay riba www.sgtpeppersfriends.com.
RIU Hotels & Resorts a habri Riu Palace Aruba na aña 2007. Debi na e gran exito di su prome hotel na Aruba, e compania a dicidi di adkiri un di dos hotel, habriendo Riu Palace Antillas na aña 2014. Hunto e dos hotelnan aki ta maneha mas o menos 25 mil huesped pa luna, cu un nivel di grado di ocupacion mas halto riba nos isla. Entre e dos hotelnan RIU na Aruba, nan ta emplea riba 800 trahado, brindando huespednan e miho nivel di servicio.