Savaneta – L.G.Smith Boulevard
Diabierna atardi 5:00 p.m informacion a drenta cu dos homber di posiblemente Venezolano, lo a caba di comete atraco na Do It Center na Savaneta.
Mes ora polisnan ariba caya a cuminsa busca e auto cu e dos hombernan lo a bandona e luga. Tawata trata di un Hyundai Accent color shinishi scur y su glasnan lo tin tint.
Informacion a cambia
Agentenan cu a yega e tienda na Savaneta a constata cu lo no tawata tin ningun sorto di arma envolvi. Di e manera eynan segun nos tin entendi no ta wordo considera atraco.
Algun minuut despues, informacion a drenta cu e mes un dos personanan aki a bay Do It Center Camacuri.
Momento cu nan tawata saliendo, polis a wordo notifica.
Autoridad a logra paranan dilanti oficina di A.T.A altura di Linear Park.
Mientras cu polis tawata tin nan eynan, nan tawata haya mas informacion.
Aparentemente e dos hombernan aki a pasa Op=Op y tambe S-Chow.
Segun nos a compronde, e personanan aki lo tin of ta usando un manera pa bruha e cahera, y di e manera eynan haya placa extra cu nan no tin derecho ariba dje.
E dos hombernan aki a yega Aruba ayera y tawata coriendo den un V-car.
Un agente di rango halto a dicidi pa entreganan den man di Guarda Nos Costa, esaki probablemente pa evita mas problema den futuro.
Ambos a wordo hiba den dos patruya pa base di Guarda Nos Costa na Sabana Berde.