ORANJESTAD — Diahuebs 6 di september, Dia di Boneiro, Premier Evelyn Wever-Croes a atende e celebracion na Boneiro.
“Cu mi presencia mi kier confirma cu nos na Aruba ta dispuesto manera semper di yuda nos rumannan na Bonaire unda cu mester. Mi ta enfatisa cu cada un di e islanan ruman, Aruba, Boneiro y Curacao, tin retonan grandi. Pero si nos traha hunto, nos ta mas fuerte pa enfrenta e retonan. Hunto nos por logra hopi mas. Mi ta felicita e dushi pueblo di Boneiro riba e dia nacional aki y cu Dios bendiciona Boneiro ricamente”, tabata palabranan di Premier Evelyn Wever-Croes den un entrevista na television di Boneiro.
Por a nota cu e presencia di Premier di Aruba, e unico mandatario di exterior cu a atende e celebracionnan, a wordo hopi bon ricibi. Y hendenan tabata contento di por a salud’e.
Ademas tabata presente secretario di Estado Hulandes Raymond Knops y Premier Wever-Croes a probecha di atende algun tema pendiente cu Hulanda. Na su regreso Premier Wever-Croes a indica cu e tabata un biahe hopi exitoso.
