ORANJESTAD: Despues di hopi speculacion, e lansamento oficial di “Aruba Island Take Over” a tuma luga Diahuebs ultimo na Moomba Beach. Aruba lo conoce un festival cu lo ‘take over’ nos isla pa 4 dia yena cu fiestanan, ‘happy hours’ y un mega concierto. Ta trata aki di u di e conciertonan di mas grandi den historia di Aruba cu presentacion J. Balvin, Bad Bunny, Alex Sensation y Jeon.
Di November 1 pa November 4 2018, Aruba Island Take Over lo ta e anfitrion di entre otro un welcome party, Aruba Ariba happy hour, pool party, beach party, boat party como tambe e concierto di aña.“Nos ta orguyoso di por anuncia cu pa prome biaha nos artista local JEON lo comparti escenario cu J.Balvin y Bad Bunny na Aruba!”, asina e representante di Aruba Island Take Over, Larissa Bermudez a anuncia durante e conferencia. E conocido Alex Sensation tambe lo ta parti di e evento.
Conhuntamente cu demas partner principal di e festival grandi aki, esta Aruba Tourism Authority (ATA), SETAR N.V., y Aruba Trading Company, Aruba ta prepara y premira cu lo ricibi bastante turista cu lo ta riba nos isla pa e 4 dianan aki. Naturalmente e promocion cu Aruba lo ricibi por medio di e artistanan lo ta algo inpagabel.
Tanto e DJnan como tambe e artistanan grandi cu lo t’ey ta un atraccion riba nan mes pa grandi y esunnan mas hoben cu ta bin bishita Aruba, banda di e mezcla di genero musical manera reggaeton, urban, house music y techno entre otro, cu tambe e turistanan lo por disfruta di dje durante e “Aruba Island Take Over”. Entre otro ariba diasabra lo tin un tremendo Pool y Beach Party presenta pa EF y Partai. Aki por mira con e mundo urbano ta topa cu esun electronico den un festival.
E prome edicion di Aruba Island Take Over (AITO) ta presenta pa Aruba Tourism Authority (ATA), Aruba Trading Company, SETAR N.V., Elite Empire Entertainment, EF, Aruba Marriot Resort, Top Drive, Hilton Aruba Caribbean, Hyatt Regency Aruba Resort, Fun Miles, Renaissance Aruba Resort y Super Car Rental.
E prome 700 carchinan na un prijs sumamente special lo ta obtenibel solamente diasabra awor na Setar Store Caya Betico Croes for di 10.30 di mainta. Ora esakinan caba e prijs lo subi. Pa mas informacion, line-up di artista, compra di tickets y mas bishita www.islandtakeover.com of www.facebook.com/islandtakeover. Pa informacion VIP y reserva mesa yama na 5696446.