Un biaha mas nos ta constata e calidad abou di cierto periodistanan y medionan social cu tin na Aruba. Despues cu Speed Andrade y su ekipo a hungo un mal joke prome di april ultimo mustrando cu dos curpa a wordo haya sin bida na costa di Aruba, 24ora.com a bolbe mustra nan inhumanidad filmando pa 17 minuut largo con un persona ambulante conoci na Aruba tawata den dolor y halando su ultimo rosea sin cu e reportero aki di 24ora.com a brinda e persona aki un palabra di consuelo prome cu esaki a entrega.
24ora.com pa hustifica nan acto inhumano, a declara cu pa ley nan no mag di a mishi cu e persona mientras cu den ley niun caminda ta para tampoco cu si nan por filma un persona den un momento asina tristo y doloroso. Pero 24ora.com cu e fin di culpa Gobierno of MEP ta capas di tur inhumanidad posibel contal cu nan corant online haya likes di pueblo.
Awo un biaha mas Speed Andrade ta mustra su parti inhumano y enbes di busca solucion ta yama polis pa despues para filma un homber suno pafo na Cede di MEP na Santa Cruz. Ta di lamenta cu Speed Andrade no tin respet pa hende di edad, un persona conoci den Santa Cruz, cu parce no ta mucho bon di salud y ya caba su mente ta bayendo atras.
Ta parce cu 24ora.com y Speed Andrade ta hiba gozo pa wak y filma actonan cu pa mayoria hende den nos comunidad ta wordo considera actonan di tristesa cu merece compasion. Pa Speed Andrade esaki no ta asina. Pa Speed Andrade, cosnan asina ta yen’e cu satisfaccion inmenso keriendo cu pueblo lo goza tambe di su actonan contra naturalesa.
Nos ta condena e actonan inhumano aki di 24ora.com y di Speed Andrade. Pueblo mester rechasa e tipo di medianan y periodismo bahonan aki. Esakinan ta medionan cu enbes di aporta na noticia drechi, ta prefera di keda pusha noticianan falso y inhumano. Ban hunto desaproba e metodo di 24ora.com y Speed Andrade di hiba periodismo y influencia mentenan di nos hobennan cu lo pensa cu filma hende muriendo of suno y laga esakinan pasa pa noticia ta algo normal. #unlike 24ora.com