ORANJESTAD – Dialuna atardi Minister di Turismo, Salubridad Publico y Deporte Sr. Dangui Oduber tabata den parlamento. Pa prome biaha den historia den cuadro di transparencia, a duna cuenta na parlamento y comunidad di Aruba riba e prome 6 lunanan di presupuesto 2018. Minister Dangui Oduber a elabora riba loke cu gobierno a hereda y tambe riba e logronan di su ministerio y loke cu ainda falta.
Gobierno anterior
No ta un secreto cu gobierno a hereda un disaster for di e gobierno di Sr. Mike Eman, segun e minister un cama yena cu clabo, un pais yena cu debe y cu crisis tur caminda. A hereda un pais sin perspectiva y sin futuro pa nos yiunan. Pero nos a sa di asumi e responsabilidad den e tempo dificil aki y asina mes demonstra, treciendo e cambio y solucion segun e mandatario.
Turismo
Minister Oduber a trece dilanti cu aña 2018 ta un aña record den Turismo den tur sentido. Pais Aruba mester ta sumamente contento cu cifranan cu nos ta conociendo den 2018. Turismo ta carga nos economia y pesey ta importante pa comparti cu parlamento y comunidad di Aruba e resultadonan.
Apesar cu nos a perde e mercado di Venezuela, e cifra di e cantidad di turistanan cu ta hospeda na Aruba a subi cu 2% compara cu aña 2017. Y esaki ta cu e mercado di Venezuela a cay cu 53% compara cu aña 2017. E prome 7 lunanan di aña 2018 Aruba a ricibi un total di 641.763 turista.
E mercado number 1 ta keda e mercado di USA cu ta conoce un crecemento di 7.4% cu ta un total di 423.412 turista, 71% di Aruba su turistanan ta procedente di USA. Actualmente Canada ta Aruba su di 2 mercado mas grandi y gobierno lo sigi engrandece e mercado aki creando mas vuelo pa Canada.
Turismo crusero tambe a conoce un crecemento di 3% e prome 7 lunanan aki cu un total di 467.025 turista.
A logra habri rutanan nobo pa Dallas, Chicago, Minneapolis y Brussels y esey a contribui na aumento den e total di “seat capacity” pa cu vuelonan pa Aruba.
Tambe tin varios proyectonan den pipeline manera:
Programa di certificacion di ATA pa mehora e servicio den sector turistico.
Proyectonan di infrastructura:
- Highrise otro banda di Hyatt, aki lo drecha e caminda, pone pavers, construi parking spaces mas structura y organiza.
- Proyecto di Rails na terminal crusero, aki lo bay pone railings pa mehora e infrastructura pa haci e area aki mas sigur pa e turistanan crusero.
- Gateway 2030: Proyecto di mas grandi den historia di Aruba, un proyecto di 275 miyon dollar cu lo genera entrada pa gobierno riba un “spin off” economic. E proyecto lo crea entre 400 pa 500 cupo di trabou.
- Masterplan APA cu ta den su fase final, aki lo mehora e infrastructura den e area crusero y di ex waf.
Segun Minister Dangui Oduber nan ta goberna cu un consenshi limpi y na un manera transparente y pesey nan ta den parlamento sin nada di sconde. Pa promer biaha den historia un gobierno ta bin parlamento den e promer mita di aña pa bin duna cuenta con nan ta maneha placa di pueblo.