E sospechoso di e asesinato riba e parkeerplaats den Hotzone ainda ta den libertad
Palm Beach: Dialuna den oranan di merdia vocero di Ministerio publico a informa cu ainda e sospechoso principal di e asesinato riba e parkeerplaats den Hotzone ta den libertad.
Autoridad mester ta na altura ken e asesino ta, despues cu nan a logra pone man riba e pick up cora, den cual e sospechoso principal envolvi den e caso di asesinato den hotzone a bandona sitio cune, despues di a hinca Camilo Sosa qepd.
E pickup cora a keda confisca na un cas na Tanki Leendert, aparentemente ta e cas caminda e sospechoso y su ruman homber lo ta biba, pero na momento cu autoridad a bay confisca e pickup no tabata tin niun hende na cas. Diadomingo den oranan di dia no a yega niun hende mas na e cas aki, ta Diadomingo anochi a yega un homber eynan a busca algo y a sali bek.
E sospechoso di e asesinato sigur ta scondi un caminda, pero autoridad sa ken e ta caba y no lo dura hopi cu nan lo hay’e y deten’e, si acaso e no entrega su mes na autoridad prome cu nan hay’e. Importante ta pa sa, cu si un persona tin’e scondi e ta complice. Ban spera e recapacita, e entrega su mes y para pa su acto aki y sinta su condena.
Segun un fuente a informa nos, Camilo lo tabata na cas preparando pa bay drumi y ta wordo busca of yama pa un amigo pa posiblemente sali un rato, e ta dicidi di bay y a result’e fatal.
Camilo a wordo hinka fatalmente bou su brasa links, no a sangra hopi, aparentemente elo a wordo hinka cu un obheto fini, parecido na un schroefdraai.
Despues cu ela wordo hinka, mesora ela sak den otro y a sangra masha tiki mes. Manera por observa riba e foto aki
Segun nos a compronde, prome cu Camilo a wordo hinka a surgi no un pelea, pero un discussion entre e victima y su asesino, aparentemente tocante un problema bieu, cu nan lo tabata tin cu otro.
Mesora despues cu ela wordo hinka, su amigonan na e sitio a spanta y a core pone den un jeep y a hib’e hospital, caminda un rato despues e ta fayece.
Un caso tristo caminda un hoben di 22 aña ta perde su bida y un otro hoben ta haya e titulo di asesino. Pa ambos famia sigur e ta algo hopi doloroso.
.
