ORANJESTAD, Aruba – 4 di September 2018: E aña aki e Seleccion Nacional di Aruba lo competi den e CONCACAF Nations League 2018. Seleccion Nacional lo ta hungando e fin di siman aki den Stadion Ergilio Hato na Corsou contra di Bermuda. E torneo Nations League ta p’e paisnan cu ta miembro di CONCACAF.
E Seleccion Nacional di Aruba lo hunga 4 wega den e CONCACAF Nations League. E prome wega lo ta dia 9 di September proximo, mientras e di dos wega lo ta na October, e di tres na November y e ultimo wega lo ta na Maart 2019. Den luna di November Aruba lo mester ta e anfitrion di e wega, pero ainda no ta sigur.
E team tecnico di Arubaanse Voetbal Bond (AVB) a prepara e hungadonan pa lunanan, kendenan a bay den un training intensivo. Pa nan por yega den seleccion, e team tecnico a selecciona hungadonan di diferente team di Aruba, pero tambe hungadonan di Hulanda cu ta yiunan di Arubano. Un biaha mas a scoge hungadonan di Hulanda pa forma parti di e seleccion nacional pa sigui hisa e nivel di futbol.
Pa por a yega na e 22 hungado di e seleccion, Martin Koopman, head coach, y e team tecnico di e seleccion a mira diferente hungado prome cu a scoge esunnan cu lo forma parti di e seleccion. Martin Koopman hunto cu e team tecnico a firma un acuerdo cu e hungadonan di seleccion, di cual nan tin cu mantene nan mes na e reglanan. E team tecnico ta contento pa mira cu e hungadonan ta mantene nan mes na e acuerdo aki pa por keda den e seleccion. E seleccion nacional ta preparando fuerte pa asina representa Aruba den e CONCACAF Nations League
E team tecnico di e seleccion ta consisti di Martin Koopmans (head coach), Marvix Bermudez (assistent di coach), Hernan Jose Echvarri (coach di keeper), Janinr vd Hoorn (experto di material), Alwin Tromp (manager di team), Charles Helmeyer (Fysoterapista) y Ricardo Vargas (dokter). E seleccion di hungado ta consisti di keeper Eric Abdul (Dakota), Jean Marc Antersijn (SV Tec), Lionel Kaarsbaan (Dakota), defensa Nickenson Paul (Dakota), Nathan Lo-A-Njoe ( RCA), Leroy Oehlers (FC Lisse), Jean-Pierre Heyden (Nacional), Gino Mulder (HBS), Jefferson Vegas Morales (RKSV SARTO), bolante Walter Bennet (Excelsior Maassluis), Edward Clarissa (Nacional), Raymond Baten (Quick Boys), Jeamirr Howell Brokken (RCA), Liomar Croes (Dakota), Rua Melchor (RCA), Erik Santos do Gouveia (RCA), delantero Ricky Hodge (Dakota), Joshua Gross Santana (ASWH), Jean-Pierre Fingal (RCA), Ronald Gomez (RCA), Josua John (Bursaspor) y Annuar Kock (Estrella).
Dialuna atardi e hungadonan di Hulanda a yega y AVB a ricibi nan. Tur 22 hungado ta hunto y lo ta den train e resto di dianan aki prome cu bay hunga na Corsou.
