Mes momento cu Gabinete Wever-Croes a anuncia e ‘Crisisheffing’, a anuncia cu esaki lo ta algo temporal mientras ta trahando riba e Reforma Fiscal. E reforma di nos sistema di impuesto ta bay inclui un cambio di e sistema di impuesto pa haci e sistema na un forma mas husto. Prome Minister Evelyn Wever-Croes a duna di conoce cu e luna aki ta crucial den e proceso pa yega na e reforma di impuesto.
Riba peticion di Gabinete Wever-Croes pa yuda Gobierno yega na e sistema di impuesto mas husto aki, IMF ta na Aruba pa dos siman. Reunionnan a cuminsa riba e tema di Reforma Fiscal. Lo cuminsa inventarisa tur loke Gobierno a haci den e lunanan cu a pasa riba e tema aki y pa despues valida e proceso cu Gobierno ta canando. Despues cu e trabounan di inventarisacion keda cla, definitivamente Gobierno ta cla pa anuncia cua ta e tipo di impuesto indirecto nobo cu lo bay tin y kico Gobierno ta haciendo.
“Cu e experiencia di IMF y cu e opcionnan cu Gobierno a presenta na IMF, lo yega na un reforma di impuesto husto pa Aruba. IMF a duna di conoce cu nan ta hopi impresiona cu locual Gobierno di Aruba a haci riba e Reforma Fiscal y a expresa cu nan ta full dispuesto pa yuda Aruba yega na un solucion cu lo trece alivio pa nos pueblo”, Prome Minister Evelyn Wever-Croes a duna di conoce.