Parlamentario Endy Croes ta splica cu desde diahuebs siman pasa a inicia e reunion unda pa promer biaha den historia Parlamento a manda yama tur minister aden pa asina duna cuenta con nan a gasta placa di nan presupuesto den e promer 6 lunanan di 2018 y asina Parlamento por controla pa no mester bin bek pa pidi suppletoire begroting pero por haci ahustenan necesario budget neutral y cumpli cu e disciplina pa corigi e desaster financiero hereda cu AVP y Mike Eman a laga atras.
Herencia laga atras pa AVP
Berdad no ta e momento mas facil pa goberna Pais Aruba. Sigur si tene na cuenta cu a hereda un Aruba cu un debe nacional cual a redobla den 8 aña di AVP di 41.7% na 2008 pa 90% na 2017. Sin mas locual tambe ta tristo ta e manera cu Mike Eman y AVP a presta placa na un forma descontrola hibando e debe total di 2 BIYON (2009) den 23 aña di Status Aparte pa 4.2 BIYON den 2017, esta den apenas 8 aña di AVP a presta 2.2 BIYON extra locual den 23 aña tur e gobiernonan a presta hunto. Esaki a causa cu Aruba lo paga den 2018 un suma di 216 MIYON florin solamente na interes y no riba e capital. Esaki ta igual na 600 mil florin pa cada dia cu e pueblo aki mester paga na interes riba placa cu Mike Eman a presta. Den e situacion aki casi ingobernabel e Coalicion mester goberna y trata na yuda tur hende y primordialmente Pais Aruba.
Finansas publico bao control
Den e promer 6 lunanan mester bisa cu gobierno a score un 9 (negen). Rapport ta ilustra cu gastonan di gobierno ta na 47.1% di e total di 100% cu nan lo por gasta di acuerdo cu presupuesto 2018. Esaki ta duna indicacion cu den e lunanan cu ta resta di aña 2018 nan tin tur cos bou di control y no lo surpasa 100%. Tin post manera vakantie uitkering den presupuesto cual si a wordo gasta 100% door cu a paga esaki 100% na juni y pues esaki ta inclui den e gastonan total cual awe ta refleha 47.1%. Di otro banda Parlamento a tira un bista di entradanan di gobierno. Presupuesta pa aña 2018 tin na entrada 1.330.332.400 pues 1.3 BIYON di cual 50.2% a drenta caha di gobierno caba esta Afl. 668.341.720 cual ta duna indicacion cu gobierno lo bay cumpli cu su meta pa cu entrada, esta “middelen”. Resumiendo mester duna Gabinete Wever Croes y sigur Promer Minister, Minister di Finansas y tur e Ministernan di Gabinete un “pluimpje” y felicitanan pa e logro di e promer 6 lunanan pa locual ta trata e maneho financiero y mantenemento di cada un na nan meta di entrada y gasto.
Gobierno actual ta ilustrando cu nan no mester di ningun CAFT pero di curason ta trahando pa ruim op de boel cu Mike Eman a laga atras y crea espacio pa inversionnan cu lo trece felicidad poco poco pero sigur bek den henter e pueblo. Pabien Gobierno!
