ORANJESTAD – Diasabra ultimo Minister di Finansa, Asuntonan Economico y Cultura a aisti na e premiere di e pelicula “Ciudad Oraño”. Ta trata di un bunita pelicula skirbi y dirigi pa e hoben Juan Fransisco Pardo kende na e edad di 14 aña a skirbi e script pa e pelicula aki. Un pelicula cu ta ilustra algun di e retonan cu nos hoben nan ta enfrenta na nos propio Pais.
Despues di e evento Minister Ruiz-Maduro tabata tin e placer di combersa un rato cu mayornan y famia di Juan Fransisco Pardo, kende a comparti cu e mandatario con nan tabata e promer actornan di Juan Fransisco su grabacionnan. Un palabra di gratitud ta bay na e mayornan di Juan Francisco Pardo pa a brinda e inspiracion y sosten necesario pa awe nos por conta cu produccion local manera e pelicula ‘Abo so’ y awor ‘Ciudad Oraño’. E mandatario a hiba palabra y a felicita Juan Fransisco Pardo y henter e elenco di Ciudad Oraño pa e bunita pelicula den cual nos talentonan local un bez mas ta resalta. E invitacion ta bay pa Pueblo en general y specialmente na nos hobennan pa mira e pelicula y asina brinda apoyo na nos hoben talentonan local.
