Home » Fundacion Turtugaruba ta cumpli 15 aña di existencia

Fundacion Turtugaruba ta cumpli 15 aña di existencia

by Admin
0 comment 52 views
Dia 3 di September 2003 un grupo di voluntario entusiasma a lanta Fundacion
Turtugaruba.
Diez aña prome, den aña 1993, a worde introduci un Sea Turtle Recovery Action
Plan (STRAP) na Aruba, mescos cu den e resto di Caribe como un initiativa di
United Nations Environment Programme (UNEP).
Tom Barmes cu tawata traha na DLVV (Santa Rosa) a scirbi e STRAP pa Aruba
hunto cu Karen Eckert, directora di WIDECAST (Wider Caribbean Sea Turtle
Conservation Network). Asina a cuminsa e proteccion di turtuga di lama na Aruba
segun un plan cu awendia ainda ta sigui. Tom, cu lastimamente a fayece den
2006, a forma un grupo di voluntario pa asisti, pasobra naturalesa no conoce
orario di trabao manera na DLVV.
E grupo di voluntario aki tawata yama nan mes Widecast Aruba. Y ainda tin un par
di nan cu ta activo como voluntario non-stop. Nan a cuminsa door di proteha e
neishinan di Driekiel na Palm Beach y Eagle Beach.
Pero tambe a investiga cua otro tipo di turtuga ta pone webo na Aruba y ariba cua
playanan. Despues di hopi aña di investiga e playanan mainta trempan cada dia,
nos tin awo, cu 25 aña di informacion un bon bista ariba e actividadnan di turtuga
riba nos isla.
Tin 4 diferente tipo di turtuga di lama cu ta bishita Aruba pa pone webo, cada un
den nan mesun temporada:
Driekiel – Leatherback Sea Turtle – Lederschildpad (Maart – September)
Cawama – Loggerhead Sea Turtle – Dikkopschildpad (Mei – September)
Caret – Hawksbill Sea Turtle – Karetschildpad (Juni – December)
Turtuga Blanco – Green Turtle – Soepschildpad (Juli-November)
Tambe a determina e peligernan mas grandi pa e existencia di e turtuganan di
Aruba y con pa trata cu e problemanan aki. A pesar di hopi esfuerso durante tur e
añanan e probleman ainda ta vigente. Pero danki na tur e esfuersonan incansabel
di e voluntarionan ainda e turtuganan tey.
Na Aruba e turtuganan ta den peliger di extinccion door di sushedad, coremento
riba santo blanco cu quads y 4WDs y e perdida di playanan pa pone nest door di
desaroyo di e costa pa turismo. Desaroyo di e costanan ta trece luz artificial. Y luz
artificial ta un peliger grandi pa turtuga di lama. E mama turtuga ta subi tera
anochi mayoria biaha, buscando un playa scur pa anida. Pero… awendia ta hopi dificil pa haña un playa cu ta scur ainda. Luz ta duna e mama stress y por causa cu
e ta drenta lama back sin pone webo.
Pa e baby turtuganan (hatchlings) e luz artificial ta fatal. E ta causa cu e chikitonan
ta desorienta. Nan ta cana bai na unda e luz artificial ta (palo di luz, hotel, etc.) y
nan ta keda sin haña e lama. Den e añanan 90 tawata normal pa encontra un nest
completo di 70 hatchling ariba caminda. Tur morto, placha dor di auto.
Danki na systemanan y hopi tempo y esfuerso di voluntario di Turtugaruba a logra
trece esey bao control. Pero pa un solucion duradero ta necesario pa haci luz
artificial menos visible ariba nos playanan y tin mester di control fuerte ariba
esaki. Turtuga di lama mester di playanan scur pa sobrevivi. Mas desaroyo di e
costanan no lo hasi e situacion miho pa nos turtuganan.
Ainda mas camber di hotel? Y mas actividad riba e beach ( manera fiesta di boda
te cu anochi laat, net banda di un neishi cu ta sali, of evenementonan grandi cu
lus skerpi, y den dia autobusnan yen di turista di crucero…). Esaki ta algo cu
Aruba mester tuma un decision aden. Nos kier laga disponibel un parti pa e
turtuganan?
No solamente Aruba, pero mundo henter mester di turtuga di lama!
Turtuga di lama tin un rol importante pa wanta e oceanonan saludabel. Por
ehempel, e Turtuga Blanco ta come e yerba di lama cu ta crece na e fondo di
lama. Asina ta wanta e yerbanan cortico pa nan fungi como un area pa piscanan
por deposita nan webo aden. Y e Driekiel, esun mas grandi di e turtuganan, ta
come jellyfish y ta percura pa un balance entre e jellyfish cu plankton.
Tur cuater sorto di turtuga ta realisa un rol unico den nos lama.
Pesey riba e dia di awe Turtugaruba ta sumamente orguyoso di su voluntarionan y
tur e hendenan y organisacionnan di nos comunidad cu tin nos turtuganan na
pecho. Nos kier celebra esaki cu tur hende den e aña 2018, pero na e momento
aki e turtuganan mester di nos atencion y energia mas. Tur cuater tipo di turtuga
ta activo awo, cual kiermen hopi trabao pa nos, e voluntarionan.
Nos sigui bai pe!
Pa nos turtuga di lama, nos “repeat guest” mas bieuw, semper keda bon bini na
Aruba y haña e oportunidad pa reproduci na nos isla.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio