Palm Beach: Diasabra pa mas o menos 1’or y 45 di marduga, patruya di polis ta wordo manda na altura di Brickell Bay, pa motibo cu dilanti di e hotel aki lo tin un persona ta bezig ta cometiendo destruccion na un auto.
Na yegada polis a bin topa cu un homber cu lo a mira tur loke a pasa, ela splica polis, cu un di e ocupantenan di e Toyota Yaris  A-34991, prome cu ela subi den e Yaris, ela cuminsa bula riba hood di e V car, Hyundai Accent Shinishi cu tabata staciona banda di e Toyota Yaris, E hood di e Hyundai a keda hopi machika, despues ela subi den e Yaris y nan a bay for di e sitio.
Via un camara di seguridad den e area aki, polis por a mira exactamente kiko a pasa y cu ta trata di un hoben bisti na blanco cu keds cora a bula riba e hood di e auto y despues lo a subi den e Toyota Yaris y a bay for di e sitio.
Despues di un rato e Yaris a bay bek dilanti Brickell Bay y a bolbe staciona net banda di e Hyundai Accent y e ocupantenan a baha bay direccion zuid.
Algo pasa di 3’or di marduga, e Toyota Yaris blanco a sali for di dilanti Brickell Bay y a bay direccion Oranjestad. Aparentemente un persona cu lo tabata eybanda y lo tabata sa kiko a sosode, lo a sigui e auto aki.
Na altura di Crystal Casino, un patruya di Oranjestad ta logra para e Toyota Yaris aki y nan ta bin topa cu e hoben cu a comete e destruccion na e V car Hyundai Accent shinishi di turista.
Polis a tuma tur nan datos y a bisa e hoben cu e ta wordo poni responsabel pa e destruccion aki, hunto cu e chauffeur di e Yaris e tambe lo wordo poni responsabel.
Algo cu aparentemente tabata pret pa e hobennan den e auto aki sigur a salinan caro, paso no lubida cu mayoria di caminda tin camara di seguridad cu ta capta tur movecion. Especialmente den e area di hotel y restaurantnan etc etc.
