Home » Women in Leadership Conference 2018 a refleha inspiracion, innovacion y desaroyo personal

Women in Leadership Conference 2018 a refleha inspiracion, innovacion y desaroyo personal

by Admin
0 comment 68 views

Den un sociedad unda tin igualdad, tin progreso!

CMB a haci un donacion di AWG.20.000 na FHMD!

Decenas di hende muhe profesional y diferente persona innovativo den nos comunidad a presencia un otro tremendo conferencia yena cu inspiracion y ideanan nobo. E di seis edicion di e Women in Leadership Conference a provee motivacion na tur presente cu e tremendo discurso y presentacionnan di e keynote speakers cual tabata sumamente interactivo.

E mainta a inicia cu algun palabra di Director di ATIA, Michelle de Groot, presidente di board di ATIA, Ronald van Trigt, y Senior Manager Business Development & External Sales di CMB, Lindsey Wever, y Larissa Bermudez a tuma e stage como host di e evento pa e di dos biaha.  “Nos manera ser femenino ta forma un parti dinamico den e sociedad aki. Ta esencial pa nos realisa cu nos no mester pensa manera hende homber pa nos yega na exito”, Lindsey Wever a expresa na inicio. Fuera di ta patrosinador atrobe di e di seis edicion di e conferencia aki, Caribbean Mercantile Bank N.V. a haci e bunita gesto di un double donacion di AWG.20.000-, na Fundacion Hende Muhe Den Dificultad como apoyo na yuda kibra e silencio y combati violencia domestico riba nos isla. “Nos ta hopi contento cu e evento aki cual ta conscientisa y empodera hende muhe. Pa nos,unda cu esaki wordo haci nos ta sostene. Nos ta aprecia e donacion seguramente pasobra placa semper ta un obstaculo na e fundacion, kiermen e ta wordo bon uza pa nos hende muhenan”, Magaly Maduro, coordinador di FHMD ta expresa. Den un sociedad unda tin igualdad tin progreso, y esaki a keda refleha durante e conferencia aki.

Prome Minister, Evelyn Wever-Croes
Prome Minister sra. Evelyn Wever-Croes a habri e mainta cu un tremendo discurso, lagando politica un banda y centralisando riba innovacion y igualdad.  Premier a subraya cu e hende muhe semper a enfrenta hopi obstaculo no solamente den nan bida personal pero sigur tambe den nan carera profesional. El a elabora riba e topico di Stem Research y enfatisa cu: “Laga nos ta inspira door di hendenan manera Jessica Wade, un cientifico cu personalmente a cuminsa tuma accion pa conscientisacion di hende muhe den e industria di Stem.” Premier a subraya cu 82% di articulo y biografianan den e ramo di ciencia ta tocante hende homber, y Jessica Wade a tuma e iniciativa pa bira e brug aki di muhenan cu no ta representa den e industria aki door di skirbi entradanan pa 300 muhe cientifico rond mundo pa wordo reconoci cu hende muhe ta hopi activo den e industrianan aki. Finalisando, Premier a expresa cu: “Hopi hende muhe ta gusta cuida tur otro hende prome cu nan mes; nan famia, bisiña, amigonan, mayornan etc. Pero for fabor, pone bo mes prome pa asina bo por yuda otronan mas miho. Haya e balans entre tur e areanan di bo bida y bo servicio na comunidad.”

Kelly Tomblin & Catherine Barba
Sra. Kelly Tomblin, CEO di INTREN L.C.C. a provee un presentacion spectacular y hopi interactivo desde inicio te na final. El a papia tocante desaroyo personal, e mentalidad corecto pa bo tin pa bo desaroya bo mes y yega na exito den bo bida.  “E tabata un tremendo conferencia. Mi a gusta e discurso di e Prome Minister cu a subraya cu innovacion ta cuminsa na bo mes ora cu bo ta bon para. Mi tabata sigur hopi encurasha pa ta akinan y mira asina hopi hende muhe jong cu tabata asina interesa den e topico. Mi a keda hopi inspira di e energia y curiosidad, e tabata un tremendo conferencia”, segun sra. Tomblin. Catherine Barba finalmente a cera e dia cu su presentacion energetico y sumamente informativo, enfatisando riba simplicidad y 7 punto cardinal pa bo bira un persona cu ta trece cambio den bo bida. “Curiosidad ta un punto cardinal, bo mester ta habri pa siña algo tur dia pasobra semper tin algo pa siña. Solamente hendenan cu ta haci nada ta esunnan cu ta fracasa”, Catherine Barba ta bisa.

E aña aki, ATIA a inclui panelistanan cu a consisti di hende muhe y hende homber.
ATIA ta sumamente orguyoso tambe di e panelistanan aki cu a provee un rato di discusion y analisis di topiconan hopi interesante y interactivo cu e publico: Patrick Melchiors, Tisa La Sorte, Gavril Mansur y Sanju Luidens.  ATIA kier a gradici cada un persona cu tabata presente na e conferencia aki cu a demostra cu innovacion y desaroyo personal ta bibo den nos comunidad. Tambe cu un gratitud enorme na Caribbean Mercantile Bank N.V. cu a surpasa nan meta di conscientisacion riba violencia domestico, cu resultado di a double nan promesa cu un donacion bunita di 20.000 florin na Fundacion pa Hende Muhe den Dificultad. Pa e siguiente conferencia, ATIA kier sigur mira mas hende homber presente na e conferencia pa forma parti di e discusionnan aki cu ta crucial pa e desaroyo di cada un di nos riba nos pais.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio