Semeleerstraat – Diamars anochi entre 9’or cu 10’or, un auto a yega y baha un homber cu a wordo hinca posiblemente un of mas biaha.  Segun nos a compronde, cu aparentemente e vehiculo cu a bahe a move mes ora di tereno di Hospital.
Na prome instante parse cu e victima no tawata kier a papia mucho di loke a pasa.
E caso ta mustra den e cu no a avisa ni polis of ambulance na prome instante.
Tin biaha tipo di casonan asina, esnan envolvi mes kier regla nan asunto, creando mas problema.
Algun ora despues cu e homber hinca a yega Hospital, autoridad a haya sa y mes ora a sali pa Semeleerstraat unda e problema a surgi.
Na yegada, e caya a wordo cera unda e incidente a lo a tuma luga.
Mas despues agentenan a pidi pa BFTO (departamento tecnico di polis) y tambe recherche.
Por a mira un agente ta tuma datos di algun persona cu sea a mira of tawata envolvi.
Un of mas tiro a cay
Na e sitio nos a compronde cu un vehiculo lo a haya impacto di bala.
E problema lo a cuminsa aparentemente door di un auto cu lo a sufri daño, con exactamente no ta mucho cla.
Algun bijnaam a wordo menciona di esnan cu lo tawata den un Nissan March righthand cu a bandona e area cu velocidad halto.
E homber cu a wordo hinca mientrastanto a keda interna na Hospital. Autoridad tin algun nomber, di esnan cu lo tawata den e Nissan. E personanan aki lo a los tiro y un di nan a hinca e homber.
E Nissan March lo a wordo localisa pazuid di Epb Hato, parse un señora tawata na stuur, e señora lo ta famia di un di personanan cu sea a tira of a hinca. Por a mira polisnan atendiendo cune, no ta conoci si e por a wordo treci warda di polis.
Manera nos a trece den otro noticianan, tin hopi arma di candela circulando rond ariba Aruba y nan ta den e mannan robes.
