Home Fashion ART FASHION 2018 ta bay ta uno imprecionante y diferente, “SPEAK UP”...

ART FASHION 2018 ta bay ta uno imprecionante y diferente, “SPEAK UP” topico di Art Fashion 2018.

SHARE

Diamars atardi e Team di Art Fashion 2018 a tene nan Prome Conferencia di Prensa na unda cu Tito Bolivar organisador di Art Fair a presenta e dos cara nobo nan pa cu Art Fashion 2018 esta srta. Queen-Anne Bergen y Zilha Bruin Wever cu lo ta encarga cu e Art Fashion show 2018. Hunto cu nan tabata presente e famoso diseñador Ronchi de Cuba y tambe Nathalia Perez representante di Kate Spade Aruba.

Art Fashion e aña aki ta priminti di bay ta uno imprecionante y diferente. E aña ki a escohe e topico di SPEAK UP, debi cu e Team di Art Fashion 2018 ta sinti cu di e manera aki por yuda trece concientisacion “Awareness” den nos comunidad y asina habri mas wowo y pusha mas hende pa bin dilanti pa conta nan storia “Speak Up”. Team Art Fashion 2018 ta di opinion cu tur storia ta yuda inspira otro pa sa cu nan no ta nan so y pa asina no tene berguensa di papia y busca ayudo ora cu ta necesario.

Art Fashion 2018 lo tuma lugar Diahuebs dia 4 di October cuminsando pa 6:30pm. E biaha aki a escohe e caya patras di Bibioteca Nacional na San Nicolas pa asina duna e evento un toke diferente compara cu e añanan anterior. E “Runway” riba caya ta priminti di ta uno largo, unico y yena di arte. Un anochi unda Arte y Moda ta topa otro pa un bon causa.

Ticketnan lo ta obtenibel desde Dialuna 3 di September na diferente fashion y beauty stores entre otro D-Shop, Trash by Ronchi, Lindy’s Lifestyle Boutique, Aldo, Kate Spade, Maggy’s y Penha.

Team Art Fashion 2018 ta invita Aruba completo pa bin disfruta di un anochi di arte, moda y consientisacion ”awareness”. Un anochi yena cu sopresa unda cu tambe lo tin diferente artistanan musical cu lo forma parti di e anochi aki.

Keda pendiente di tur informacion y desaroyonan via nan Facebook Page: Art Fashion 2018.