ORANJESTAD, ARUBA: Fin di weekend a culmina den un tremendo dia di famia. Cuerpo Policial Aruba tabata presente na Expo Seguridad den curason di Dakota. For di 10:00 di mainta KPA tabata tin su booth na unda nos comunidad por a haya  informacion importante con pa preveni ladronicia y diferente otro topiconan mas.
Den oranan di merdia tabata tin demonstracion y publico por a saca potret di nos unidadnan cu tabata presente. Motor Unit, K9 Unit, Mobiele Eenheid, Kust Surveillance, Polis Maritimo y Departamento di Communicacion Informacio y Prevencion di Cuerpo Policial Aruba tabata presente. Asina nos comunidad por a conoce nos agente policialnan mas di serca.
Minister di Husticia Sr. Andin Bikker y Alto comisario di Polis Sr. Andrew Hoo tambe tabata presente pa asina mira nos unidadnan haci nan presentacion y demonstracion.
Un atardi na unda e booth di KPA tabata yena cu muchanan chikito y grandi cu ta interesa den e trabou di polis. Cada un a haya e oportunidad pa papia cu nos agente policial, saca potret, mira demonstracion di nos polis canino y bisti e equipo cu polis ta uza pa combati criminalidad.
