Gabinete Wever-Croes 9 luna pasa a asumi responsabilidad pa goberna nos pais y mesora a wordo confronta cu e realidad di problemanan social na Aruba. Un realidad cu e Gobierno anterior di AVP no kier a reconoce. Lamentablemente mucho tempo e problema social a keda neglisha.
Mesora Gobierno di Aruba a trece tur experto di e area social hunto, y a traha un Crisis Plan Social. Den e plan aki a aloca 32 miyon florin pa cuminsa atende cu e problemanan social. E siguiente paso tabata pa busca asistencia di organisacionnan internacional pa yuda. Premier Evelyn Wever-Croes a biaha pa New York casi dos luna pasa pa representa Reino na Nacionan Uni y a reuni tambe cu Unicef.
Despues di e reunion cu Unicef, tramitenan a wordo haci, y dos siman pasa Unicef a bin Aruba pa haci un assessment si nan por yuda y con. Nan a presenta nan conclusionnan preliminar na Gobierno di Aruba, y dentro di poco lo manda e relato final.
“Siman pasa mi a ricibi e delegacion di Unicef cu riba peticion di Gobierno a bin yuda nos cu e plan pa por brinda nos muchananan proteccion. Nan a duna un relato di cual ta e aspectonan cu Aruba mester mehora pa protehe nos muchanan miho. Nan a elogia nos trahadornan social, cu ta traha cu alma y cuerpo. Y nan tabata tin hopi elogio pa Gobierno di Aruba cu awor si ta pone prioridad na e ser humano y e mucha en especial. Apesar di tur reto, nos lucha ta pa duna tur mucha e proteccion cu nan merece. Mi ta hopi satisfecho cu nos a logra convence Unicef pa bin Aruba asina lihe y cu nan ta dispuesto den yuda nos pone tur energia hunto pa traha den bienestar di nos muchanan” Premier Evelyn Wever-Croes a duna di conoce.
