Weststraat, Oranjestad: Diamars den careda di 11’or y 15 di mainta, presencia di polis ta wordo pidi cu urgencia pa un pelea.
Na prome instante a bisa cu ta den Chilistraat, despues cu ta den Braziliestraat y na ultimo un patruya di polis ta bin topa cu e problema na e Supermercado Win Lee den Weststraat.
Na yegada polis ta bay papia cu ambos partido, y ta bin compronde, cu un señora a bay cumpra cos den e supermercado aki, acompañia pa su dos yiunan, un par di morocho mucha homber hoben.
Un di e mucha hombernan aki a coy un botter di Glacial y ora e chines a bisanan pa nan warda un rato, e muchanan aki a pusha e chines, pa nan sali, eynan a start un pelea cu a bay caba ariba caya.
Despues cu polis a revisa e camara di seguridad, enberdad por a mira cu un di e mucha hombernan aki a horta un botter di glacial, y ela cora bay cune.
Polis a cana hunto cu e mucha homber bay busca e botter di Glacial na unda ela sconde, esaki tabata den un caya mas pabou den un caha di carton den mondi. Despues di a entrega esaki bek, e chines a dunanan nan caha di cornflakes. E chines no tabata desea di entrega keho, pero si ela pidi pa e muchanan aki nunca mas drenta den su Supermercado.
