ORANJESTAD- Traha riba un relacion di comunicacion transparente y mutuo cu pueblo di Aruba y alabes trece un mehoracion den e comunicacion interno den e Departamento. Esaki ta e meta principal di e vocero di Departamento di Asunto Social, kende a keda introduci oficialmente.
Dialuna 27 di augustus durante e conferencia semanal di Gobierno di Aruba, a keda introduci na prensa y na comunidad henter e vocero nobo di Departamento di Asunto Social, kende ta Jesseline Soto Garcia-Kelly.
Jesseline Soto Garcia-Kelly ta un empleado publico cu a fungi pa 9 aña e funcion di directiesecretaresse na Departamento di Asunto Social. Pa e ultimo 7 aña su persona ademas di su trabounan regular a yuda eherce boluntariamente e trabounan di PR pa e Departamento.
Departamento di Asunto Social kier establece un relacion stabielcu e comunidad di Aruba y p’esey mes a dicidi cu e ora a yega pa bini bek cu un vocero pa asina no solamente entre otro duna informacion tocante su servicionan pero tambe aclaria hopi bes informacionnan eroneo cu ta wordo papia den comunidad.
Departamento di Asunto Social kier extende su palabra di exito pa su vocero nobo y ta conta cu un colaboracion cu pueblo y prensa di Aruba. Jesseline Soto Garcia-Kelly ta disponibel telefonicamente na 528-1100 of via e-mail na [email protected]
